चालू तासिकेच्या वेळेत शिक्षिका झोपेत, व्हिडीओ सोशल मिडीयावर व्हायरल

एज्युवार्ता न्यूज नेटवर्क

अमरावती शहरातील श्री रामकृष्ण क्रीडा आदिवासी प्राथमिक आश्रम शाळेची (Adivasi Primary Ashram School) चिंताजनक बाब समोर आली आहे. येथील एक शिक्षिका चालू तासिकेत झोपलेल्या (The teacher fell asleep during class) पाहायला मिळत आहे. तर विद्यार्थी वर्गाबाहेर खेळत असल्याचे उघडकीस आले आहे. यामुळे आदिवासी समुदायातील विद्यार्थ्यांचे अनेक प्रश्न ऐरणीवर आले आहेत. तासिका सुरू असताना शिक्षिकेचा वर्गात झोपेत असल्याचे पालकांनी सांगितले आहे. या घटनेचा व्हिडीओ सोशल मिडीयावर व्हायरल (Video goes viral on social media) झाल्यानंतर पालकांमध्ये मोठा संताप निर्माण झाला असून, शाळेतील शिक्षण प्रक्रियेवर प्रश्न उपस्थित केला गेला आहे.

घडलेली ही घटना प्राथमिक ते माध्यमिक स्तरावर शिकणाऱ्या आदिवासी विद्यार्थ्यांच्या शैक्षणिक दर्जावर गंभीरपणे परिणाम करणारी असल्याचे पालकांचे म्हणणे आहे. तासिकेच्या वेळी शिक्षिका झोपेत असल्यास विद्यार्थ्यांचे शिक्षण कसे चांगले होईल? अशी विचारणा पालकांनी केली आहे. तर काहींनी प्रशासन आणि आदिवासी विभागावर कारवाई करा, अशी मागणी केली आहे. 

स्थानिक समाजिक कार्यकर्त्यांनी या प्रकरणाकडे दुर्लक्ष न करता त्वरित तपास करावा आणि दोषी शिक्षिकेविरुद्ध योग्य ती कारवाई करण्यात यावी, अशी मागणी केली आहे. आदिवासी विभागाकडे शैक्षणिक समस्या आणि दर्जा सुधारण्यासाठी योजना आहेत का? हे स्पष्ट करण्यात यावे, अशी मागणीही उच्च स्तरावर करण्यात आली आहे. शाळा प्रशासनाकडून अद्याप यावर अधिकृत प्रतिक्रिया आलेली नाही. पालक आणि समाजिक कार्यकर्त्यांची अपेक्षा आहे की, संबंधित अधिकार्‍यांनी या घटनेचा गांभीर्याने विचार करून योग्य निर्णय घ्यावा आणि विद्यार्थ्यांना दर्जेदार शिक्षण मिळावे, अशी आशा व्यक्त केली जात आहे.