TET अंतिम निकालापूर्वी परीक्षा परिषदेने आणखी एक प्रश्न केला रद्द; आयुक्तांची माहिती 

एज्युवार्ता न्यूज नेटवर्क 

महाराष्ट्र राज्य परीक्षा परिषदेतर्फे 23 नोव्हेंबर 2025 रोजी घेण्यात आलेल्या महाराष्ट्र शिक्षक पात्रता परीक्षा अर्थात टीईटी परीक्षेचा निकाल काही तासांमध्ये जाहीर होणार असून त्यापूर्वी काही तास आधी परीक्षा परिषदेतर्फे पेपर क्रमांक एक मधील प्रश्न रद्द करण्यात आला असल्याची माहिती परीक्षा परिषदेतर्फे जाहीर करण्यात आली आहे.परीक्षा परिषदेच्या आयुक्त अनुराधा ओक यांनी परिपत्रकाद्वारे ही माहिती प्रसिद्ध केली आहे.

परीक्षा परिषदेतर्फे महाराष्ट्रातील विविध जिल्ह्यात टीईटी परीक्षा घेण्यात आली. इयत्ता पहिली ते पाचवी साठी पेपर क्रमांक एक व सहावी ते आठवीसाठी पेपर क्रमांक दोन चा अंतरिम निकाल परिषदेच्या संकेतस्थळावर 16 जानेवारी 2026 रोजी प्रसिद्ध करण्यात आला होता. सदरील अंतरिम निकालावर 16 जानेवारी ते 21 जानेवारीपर्यंत गुण पडताळणी व आक्षेप मागविण्यात आले होते.

परीक्षा परिषदेने 16 जानेवारी 2026 रोजी प्रसिद्ध केलेल्या अंतरिम निकालावरील प्राप्त झालेल्या हरकतीनुसार पेपर क्रमांक एक मधील परिसर अभ्यास विषयातील प्रश्न क्रमांक संच ए मधील 147, संच बी मधील 142, संच सी मधील 137 आणि संच डी मधील 132 याबाबत आक्षेप प्राप्त झाले. या आक्षेपावर तज्ञ व समीक्षकांच्या अभिप्रायानुसार हा प्रश्न रद्द करण्यात आला आहे. त्यानुसारच अंतिम निकाल प्रसिद्ध करण्यात येणार आहे, याची संबंधितांनी नोंद घ्यावी, असे परीक्षा परिषदेच्या आयुक्त अनुराधा ओक यांनी परिपत्रकाद्वारे स्पष्ट केले आहे.

परीक्षा परिषदेतर्फे 23 नोव्हेंबर 2025 रोजी घेण्यात आलेल्या टीईटी परीक्षेस प्रविष्ट होणाऱ्या उमेदवारांची संख्या यंदा चांगलीच वाढली. या परीक्षेसाठी राज्यभरातील 4 लाख 75 हजार 668 उमेदवारांनी नोंदणी केली होती. राज्यातील 1420 परीक्षा केंद्रांवर या उमेदवारांची परीक्षा घेण्यात आली. परीक्षेची उत्तरसूची जाहीर करण्यात आली. त्यानंतर उमेदवारांना त्यांच्या लॉगिनमध्ये अंतरिम निकाल पाहण्यासाठी उपलब्ध करून देण्यात आला. गेल्या वर्षीच्या तुलनेत यंदा परीक्षेचा निकालात सुमारे दहा टक्क्यांपर्यंत वाढ झाली. मात्र त्यात आणखी वाढ होण्याची शक्यता आहे. 3 फेब्रुबारी रोजी सायंकाळपर्यंत TET परीक्षेचा अंतिम निकाल जाहीर होणार असल्याचे  परीक्षा परिषदेतील विश्वसनीय सूत्रांनी सांगितले.