विद्यापीठातील 111 प्राध्यापकांच्या भरतीसाठी 14 सप्टेंबरपासून अर्ज भरता येणार ; नवी जाहिरात प्रसिध्द
प्राध्यापक भरतीसाठी येत्या 14 सप्टेंबर ते 6 ऑक्टोबर या कालावधीत उमेदवारांकडून अर्ज स्वीकारले जाणार आहेत.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठातील (Savitribai Phule Pune University) विविध विभागांमधील प्राध्यापकांच्या 111 रिक्त पदांच्या भरतीसाठी(Recruitment of 111 Vacancies of Professors) नव्याने जाहिरात (New Advertisement) प्रसिद्ध करण्यात आली आहे आहे. त्यानुसार येत्या 14 सप्टेंबर ते 6 ऑक्टोबर या कालावधीत उमेदवारांकडून अर्ज स्वीकारले जाणार आहेत.
' एज्युवार्ता'ने जाहिरात प्रसिध्द होणार असल्याचे वृत्त प्रसिध्द केले होते: विद्यापीठातील 111 प्राध्यापक भरतीची नवी जाहिरात आठवड्याभरात ; एसईबीसी आरक्षणाचा समावेश
विद्यापीठातर्फे 111 पदांसाठी फेब्रुवारी 2024 पर्यंत पात्र उमेदवारांकडून अर्ज स्वीकारण्यात आले. तब्बल पाच हजाराहून अधिक उमेदवारांनी विद्यापीठाकडे अर्ज केले.मात्र, प्राध्यापक भरतीसाठी मराठा आरक्षण लागू करण्यास राज्य शासनाने मान्यता दिली. त्यामुळे सुधारित जाहिरात प्रसिध्द करून पद भरती केली जाणार आहे. त्यानुसार सुधारित जाहिरात विद्यापीठाच्या https://admin.unipune.ac.in/recruitment/ संकेतस्थळावर प्रसिद्ध करण्यात आली आहे, विद्यापीठाच्या प्रभारी कुलसचिव डॉ.ज्योती भाकरे यांनी ही जाहिरात प्रसिध्द केली आहे.
प्रामुख्याने बदललेल्या जाहिरातीमध्ये खुल्या संवर्गातील आणि नव्याने समाविष्ट करण्यात आलेल्या दहा टक्के एसईबीसी संवर्गातील जागांमध्ये बदल केला जाणार आहे. प्राध्यापकांच्या 111 रिक्त पदांच्या भरतीसाठी शैक्षणिक पात्रता, अनुभव, आरक्षण तसेच इतर माहिती विद्यापीठाच्या संकेतस्थळावर देण्यात आली आहे.
