CET Cell च्या आदेशाला पीआयसीटी काॅलेजकडून केराची टोपली; प्रवेश रद्द करण्याची मागणी 

एज्युवार्ता न्यूज नेटवर्क 

पुणे इन्स्टिट्यूट ऑफ कम्प्युटर टेक्नॉलॉजी (Pune Institute of Computer Technology) या संस्थेने नियमबाह्य प्रवेश प्रक्रिया राबविल्याची तक्रार राज्य सामायिक प्रवेश परीक्षा कक्षाकडे (State Common Entrance Test Cell) करण्यात आली होती. त्यानंतर 'सीईटी-सेल' व 'डीटीई'ने (CET-CELL and DTE) पीआयसीटी ला नियमबाह्य प्रवेश रद्द केले जातील, अशी नोटीस बजावली असताना या नोटीसीला एकप्रकारे केराची टोपली दाखवण्याचे काम संस्थेकडून करण्यात आले आहे, असा आरोप युवासेनेचे सहसचिव कल्पेश यादव (Kalpesh Yadav) यांनी केला आहे. त्यांनी 'एक्स' या सोशल मिडिया अकाउंटवर पोस्ट शेअर करत नियमबाह्य प्रवेशास मंजुरी न देता सर्व प्रवेश सीईटी सेलकडून रद्द करण्यात यावेत, अशी मागणी केली आहे.  

पुणे इन्स्टिट्यूट ऑफ कम्प्युटर टेक्नॉलॉजी अर्थात पीआयसीटी या शैक्षणिक संस्थेने नियमबाह्य प्रवेश प्रक्रिया राबवण्यात कोणतीही कसर सोडली नाही. 'सीईटी-सेल' व 'डीटीई' ने पीआयसीटी ला नियमबाह्य प्रवेश रद्द केले जातील,अशी नोटीस बजावली असताना या नोटीसीला एकप्रकारे केराची टोपली दाखवली आहे. कारण पीआयसीटीने स्पॉट राऊंड नुसार राबवल्या जाणाऱ्या पीआयओ, एनआरआय , एफएन, सीआयडब्ल्यूजीसी कोट्यातील प्रवेशासाठी केवळ अर्धा तासाचा कालावधी दिला आहे. 

विद्यार्थ्यांना 13 सप्टेंबर रोजी दुपारी 2.30 ते 3.00 या कालावधीत प्रवेशासाठी रिपोर्टिंग करण्याच्या सूचना देण्यात आल्या आहेत. तर प्रत्यक्ष प्रवेश 3 ते 5 या कालावधीत केले जाणार असल्याचे परिपत्रक पीआयसीटीने 13 सप्टेंबर रोजी सकाळी प्रसिद्ध केले आहे. अर्ध्या तासात प्रवेश प्रक्रिया राबवण्यामागे आर्थिक गैरव्यवहार करण्याचा या शैक्षणिक संस्थेचा प्रयत्न असल्याचे स्पष्टपणे दिसून येते. त्यामुळे सीईटी सेल व डीटीईने पीआयसीटीच्या नियमबाह्य प्रवेश प्रक्रियेवर प्रशासक नियुक्त करावा. तसेच नियमबाह्य प्रवेशास मंजुरी न देता सर्व प्रवेश सीईटी सेलकडून रद्द करण्यात यावेत, अशी मागणी युवा सेनेचे सचि कल्पेस यादव यांच्याकडून करण्यात आली आहे.