वैद्यकीय महाविद्यालयांना विद्यार्थ्यांकडून हमीपत्र लिहून घेण्याचे कोणतेही निर्देश नाहीत    

एज्युवार्ता न्यूज नेटवर्क 

राज्यातील काही वैद्यकीय महाविद्यालये शिष्यवृत्ती (Medical Colleges Scholarship) धारक विद्यार्थ्यांकडून हमीपत्र लिहून घेत होती. मात्र, आता यावर वैद्यकीय शिक्षण विभागाने (Department of Medical Education) खुलासा केला आहे. शासकीय/ महानगरपालिका/ अनुदानित/ खाजगी विनाअनुदानित आरोग्य विज्ञान अभ्यासक्रमांच्या सर्व महाविद्यालयांना विद्यार्थ्यांकडून कोणत्याही प्रकारचे हमीपत्र लिहून घेण्याबाबत निर्देश (Instructions on not writing an undertaking) देण्यात आले नसल्याचे वैद्यकीय शिक्षण, संशोधन व आयुषच्या आयुक्तांनी (Commissioner of Medical Education, Research and AYUSH) स्पष्ट केले आहे. त्यामुळे शिष्यवृत्ती धारक विद्यार्थ्यांना मोठा दिलासा मिळाला आहे. 

सक्षम प्राधिकाऱ्यांमार्फत राबविण्यात येणाऱ्या केंद्रीभूत प्रवेश प्रक्रियेद्वारे व्यावसायिक अभ्यासक्रमास प्रवेश घेणाऱ्या तसेच, विहित मार्गाने बिगर व्यावसायिक अभ्यासक्रमास प्रवेश घेणाऱ्या एससी, एसटी ओबीसी, ईडब्ल्यूएस प्रवर्गातील ज्या विद्यार्थ्यी व विद्यार्थिनींना १०० टक्के शिक्षण शुल्काची प्रतिपूर्ती देण्यात येते, त्यांच्याकडून प्रवेशाच्यावेळी कोणतेही शिक्षण शुल्क न आकारता त्यांना प्रवेश देण्यात यावा असे निर्देश देण्यात आले आहे.

ज्या विद्यार्थ्यांना ५० टक्के शिक्षण शुल्क प्रतिपूर्ती देण्यात येतो, त्यांचेकडून फक्त ५० टक्के शिक्षण शुल्क घेऊन, त्यांना प्रवेश देण्यात यावा. शैक्षणिक संस्थांनी योजनेबाबतची माहिती सर्व विद्यार्थ्यांना देऊन संबंधित योजनेंतर्गत पात्र विद्यार्थ्यांना महाडीबीटी पोर्टलच्या वेळापत्रकानुसार अर्ज भरण्याबाबत कळवावे. सूचनांचे उल्लंघन करणाऱ्या संस्थांविरुद्ध कारवाई करण्यात येईल, असा इशारा देखील देण्यात आला आहे. 

महाविद्यालयांनी विद्यार्थ्यांपर्यंत पोहचण्याकरिता प्रयत्न करावेत. प्रथम वर्षाशिवाय इतर पुढील शैक्षणिक वर्षात प्रवेश घेणारे विद्यार्थी शिष्यवृत्तीकरिता पात्र असतील तर त्यांच्याबाबतही याप्रमाणे कार्यवाही करण्यात यावी, असे संचालनालयामार्फत निर्देश देण्यात आले असत्याचे वैद्यकीय शिक्षण विभागाने कळविले आहे.