सिंहगड डेंटल कॉलेजची संलग्नता रद्द; विद्यार्थ्यांना दुसऱ्या कॉलेजमध्ये प्रवेश देणार ,विद्यापीठाचा निर्णय

एज्युवार्ता न्यूज नेटवर्क 

गेल्या काही महिन्यांपासून वादात सापडलेल्या पुण्यातील सिंहगड डेंटल कॉलेजची संलग्नता रद्द करण्याचा निर्णय महाराष्ट्र आरोग्य विज्ञान विद्यापीठाने घेतला आहे. त्यामुळे महाविद्यालयातील विद्यार्थ्यांना इतरत्र संलग्न महाविद्यालयांमध्ये कायमस्वरूपी प्रवेश दिला जाणार आहे, यासंदर्भातील परिपत्रक विद्यापीठाचे कुलसचिव राजेंद्र बल्लाळ यांनी प्रसिद्ध केले आहे.

सिंहगड डेंटल कॉलेज संदर्भात गेल्या काही महिन्यांपासून शिक्षकेतर कर्मचारी, प्राध्यापक व विद्यार्थी आंदोलन करत असल्याचे निदर्शनास आले होते. सुमारे दोन ते अडीच वर्ष शिक्षक व शिक्षकेतर कर्मचाऱ्यांना वेतन दिले गेले नसल्याचे आरोप करण्यात आले होते. वेतन मिळत नसल्याने शिक्षकेतर कर्मचाऱ्यांनी काम बंद आंदोलन सुरू ठेवले होते. त्याचप्रमाणे डेंटल कॉलेजमधील ओपीडी बंद ठेवण्यात आली होती. विद्यार्थ्यांना शिकवण्यासाठी प्राध्यापक उपलब्ध नव्हते. त्याचप्रमाणे रुग्णालय सुद्धा बंद असल्यामुळे विद्यार्थ्यांचे प्रॅक्टिकल सुद्धा बंद होते. याबाबत नाशिक येथील महाराष्ट्र आरोग्य विज्ञान विद्यापीठाकडे वेळोवेळी तक्रारी दाखल करण्यात आल्या होत्या.

सर्व तक्रारींची दखल घेऊन त्याचप्रमाणे त्यावरील सुनावणी घेऊन महाराष्ट्र आरोग्य विज्ञान विद्यापीठाने सिंहगड डेंटल कॉलेज असलग्नित करण्याचा निर्णय घेतला आहे. महाविद्यालयातील कर्मचाऱ्यांना मे 2024 ते जानेवारी अखेरपर्यंत एकही वेतन अदा करण्यात आले नाही.२०१९ ते २०२२ या कालावधीत केवळ मूळ वेतन अदा करण्यात आले. त्याचप्रमाणे चार महिन्यांचे आदा केलेले पूर्ण वेतन पुन्हा धनादेशाद्वारे परत घेण्यात आले. दिलेले वेतन परत दिले जाईल,असे सांगण्यात आले होते, मात्र ते पुन्हा देण्यात आले नाही.

सिंहगड इन्स्टिट्यूट दिवाळीखोरीत?

 कर्मचाऱ्यांना वेतन वेळेत न दिल्यामुळे सिंहगड डेंटल कॉलेज विद्यापीठाकडून असलग्नित करण्यात आले आहे. त्याचप्रमाणे गेल्या काही दिवसांपूर्वी सिंहगड स्प्रिंग डेल स्कूलमधील पालकांनी आंदोलन केले होते. कर्मचाऱ्यांना वेतन न दिल्यामुळे कर्मचाऱ्यांनी शाळा बंद ठेवली होती. प्रजासत्ताक दिनाच्या दिवशी शाळा बंद असल्याने विद्यार्थी व पालकांनी रोष व्यक्त केला होता. या सर्व घटनांमुळे सिंहगड इन्स्टिट्यूट दिवाळखोरीत निघाले असल्याचे दिसून येत आहे.