विद्यार्थ्यांना मराठी विषय घेऊ न देणाऱ्या कॉलेजवर कायदेशीर कार्यवाही ; अधिसभेत कुलगुरूंचे आश्वासन 

एज्युवार्ता न्यूज नेटवर्क 

सावित्रीबाई फुले पुणे विद्यापीठाशी (Savitribai Phule Pune University)संलग्न शिक्रापूर येथील कस्तुरी शिक्षण संस्थेच्या (Kasturi Education Institute at Shikrapur)महाविद्यालयाने विद्यार्थ्यांना मराठी विषय घेऊ न दिल्याने (Not allowed to take Marathi subject)विद्यार्थ्यांनी विद्यापीठाकडे लेखी तक्रार केली. त्यावर याबाबत विद्यापीठ प्रशासनाने चौकशी समिती (Inquiry Committee) स्थापन केली होती. या समितीचा अहवाल विद्यापीठाकडे सादर करण्यात आला असून संबंधित अहवाल अधिष्ठाता (dean) मंडळासमोर ठेऊन पुढील कायदेशीर कार्यवाही केली जाईल, असे आश्वासन विद्यापीठाचे कुलगुरू डॉ. सुरेश गोसावी (Vice Chancellor Dr. Suresh Gosavi)यांनी आधिसभेत दिले.

मराठी भाषेला नुकताच अभिजात भाषेचा दर्जा मिळाला असून सावित्रीबाई फुले पुणे विद्यापीठाची स्थापना सुद्धा मराठी भाषेच्या विकासासाठी आणि उत्कर्षासाठी झाली आहे, अशा विद्यापीठाशी संलग्न असलेल्या महाविद्यालयामधील विद्यार्थ्यांना मराठी विषय घेऊ दिला जात नाही. ही दुर्दैवी बाब आहे. त्यातच याबाबत एका विद्यार्थ्याचा व्हिडिओ समाज माध्यमावर प्रसिद्ध झाला आहे. या प्रकरणाची गांभीर्याने दखल घेऊन संबंधित महाविद्यालयावर कारवाई करावी,असा स्थगन प्रस्ताव अधिसभा सदस्य दादाभाऊ शिनलकर यांनी आधिसभेसमोर सादर केला होता. त्यावर आधिसभेत सदस्यांनी मनोगत व्यक्त केले.

 पुणे विद्यापीठाशी संलग्न महाविद्यालयांना पूर्णवेळ प्राचार्य नाहीत. तसेच पूर्णवेळ प्राध्यापकही नाहीत, अशा अनेक महाविद्यालयांमध्ये विद्यार्थ्यांना विविध अडचणींचा सामना करावा लागतो,अशा महाविद्यालयांची संलग्नता रद्द करावी, अशी मागणी दादाभाऊ शिनलकर यांनी केली.या चर्चेत हर्ष गायकवाड यांनीही सहभाग घेतला.

कुलगुरू डॉ. सुरेश गोसावी याबाबत म्हणाले, सावित्रीबाई फुले पुणे विद्यापीठाकडे विद्यार्थ्यांची तक्रार प्राप्त झाली होती.त्याची चौकशी करण्यासाठी विद्यापीठाने समिती स्थापन केली होती.समितीचा अहवाल विद्यापीठाकडे प्राप्त झाला आहे.प्राप्त अहवाल अधिष्ठाता मंडळासमोर ठेऊन त्यावर चर्चा केली जाईल.तसेच विद्यापीठ कायद्यानुसार पुढे आवश्यक कार्यवाई केली जाईल. 

---------------------- 

दरम्यान, युवासेनेचे सह सचिव कल्पेश यादव यांनी विद्यार्थ्यांना मराठी विषय घेऊ न देणाऱ्या महाविद्यालयाची संलग्नता रद्द करावी, अशी मागणी विद्यापीठाकडे केली होती.तसेच विद्यार्थ्यांना त्रास देणाऱ्या संबंधित महाविद्यालयाविरोधात पुढे येऊन बोलणाऱ्या विद्यार्थ्यांचा व्हिडिओ समाज माध्यमावर प्रसिद्ध केला होता.