NEET पेपर फुटीनंतर खाजगी शिकवणी कायदा आणणार?
“विद्येचे माहेरघर” म्हणून ओळखल्या जाणाऱ्या पुण्याची आणि महाराष्ट्राची बदनामी होणे ही चिंतेची बाब असल्याचे महापेरेंट्स पालक संघटनेने आपल्या निवेदनात म्हटले आहे.
eduvarta@gmail.com 
एज्युवार्ता न्यूज नेटवर्क
NEET पेपर फुटीसह राज्यात वाढत चाललेल्या खाजगी कोचिंग क्लासेसच्या मनमानी कारभारावर नियंत्रण आणण्यासाठी तातडीने “महाराष्ट्र खाजगी शिकवणी कायदा” लागू करावा, अशी जोरदार मागणी महापेरेंट्स पालक संघटनेचे अध्यक्ष दिलीप सिंग विश्वकर्मा यांनी राज्यपालांकडे निवेदनाद्वारे केली आहे. तसेच या कायद्याच्या मंजुरीसाठी राज्य सरकारने विशेष अधिवेशन बोलवावे, अशीही मागणी त्यांनी केली आहे.
नुकत्याच झालेल्या नीट परीक्षा पेपरफुटी प्रकरणात पुणे शहरातील काही नामांकित महाविद्यालयांतील प्राध्यापक तसेच मोठ्या खाजगी क्लासेसची नावे समोर आल्याने पुणे शहराची प्रतिमा मलिन झाली आहे. “विद्येचे माहेरघर” म्हणून ओळखल्या जाणाऱ्या पुण्याची आणि महाराष्ट्राची बदनामी होणे ही चिंतेची बाब असल्याचे महापेरेंट्स पालक संघटनेने आपल्या निवेदनात म्हटले आहे.
राज्यात खाजगी कोचिंग क्लासेसवर नियंत्रण ठेवण्यासाठी कोणताही ठोस कायदा अथवा यंत्रणा अस्तित्वात नसल्याने क्लास चालकांचा फाजील आत्मविश्वास वाढत असल्याचा आरोपही निवेदनात करण्यात आला आहे. “महाराष्ट्र खासगी शिकवणी (विनियमन) अधिनियम २०१८” या मसुद्याचे त्वरित कायद्यात रूपांतर करून त्याची प्रभावी अंमलबजावणी करावी, अशी मागणी संघटनेने केली आहे.
इयत्ता पहिलीपासून बारावीपर्यंत तसेच व्यावसायिक अभ्यासक्रमांच्या प्रवेश परीक्षांसाठी कार्यरत असलेल्या कॉर्पोरेट कोचिंग क्लासेसवरही या कायद्यांतर्गत नियंत्रण आणण्याची आवश्यकता आहे. विविध अभ्यासक्रम व प्रवेश परीक्षांच्या नावाखाली पालकांची आर्थिक पिळवणूक होत असल्याचा आरोपही निवेदनात करयात आला आहे. त्याचप्रमाणे केजी ते पीजीपर्यंतच्या सर्व कोचिंग क्लासेससाठी कठोर नियमावली तयार करण्याची मागणी निवेदनातून करण्यात आली आहे.
राज्य सरकारने तातडीने पावले उचलून हा कायदा मंजूर करावा, अशी अपेक्षा महापेरेंट्स पालक संघटनेचे अध्यक्ष दिलीप सिंग विश्वकर्मा व्यक्त केली आहे.
