CET CELL:अभियांत्रिकी व एमबीए/एमएमएस प्रवेश नोंदणीस मुदतवाढ; २.७६ लाख विद्यार्थ्यांची नोंदणी
ई-स्क्रूटिनीचा पर्याय निवडणाऱ्या विद्यार्थ्यांच्या अर्जाची पडताळणी संबंधित ई-स्क्रूटिनी केंद्रामार्फत पूर्णपणे ऑनलाइन केली जाणार असून, त्यासाठी विद्यार्थ्यांना प्रत्यक्ष उपस्थित राहण्याची आवश्यकता नाही. तर फिजिकल स्क्रूटिनीचा पर्याय निवडणाऱ्या विद्यार्थ्यांना जवळच्या स्क्रूटिनी सेंटर (SC) किंवा फॅसिलिटेशन सेंटर (FC) येथे प्रत्यक्ष जाऊन कागदपत्रांची पडताळणी करून घ्यावी लागणार आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षामार्फत शैक्षणिक वर्ष २०२६-२७ साठी तंत्रशिक्षण विभागांतर्गत अभियांत्रिकी (BE/B.Tech) तसेच एमबीए/एमएमएस (MBA/MMS) या अभ्यासक्रमांच्या प्रवेश प्रक्रियेच्या ऑनलाइन नोंदणीस येत्या १६ जुलै २०२६ पर्यंत मुदतवाढ देण्यात आली आहे. या दोन्ही अभ्यासक्रमांसाठी आतापर्यंत २ लाख ७६ हजार ७९४ विद्यार्थ्यांनी नोंदणी केली आहे.सीईटी कक्षाने एप्रिल व मे २०२६ मध्ये झालेल्या MAH CET परीक्षेला बसलेल्या सर्व पात्र विद्यार्थ्यांना प्रवेश प्रक्रियेसाठी विहित मुदतीत ऑनलाइन नोंदणी करण्याचे आवाहन केले आहे.
विद्यार्थ्यांनी ऑनलाइन अर्ज भरताना आवश्यक कागदपत्रे स्कॅन करून अपलोड करणे बंधनकारक आहे. अर्जाची पडताळणी ई-स्क्रूटिनी (E-Scrutiny) किंवा फिजिकल स्क्रूटिनी (Physical Scrutiny) या दोन पर्यायांपैकी कोणत्याही एका पद्धतीने करता येणार आहे.
ई-स्क्रूटिनीचा पर्याय निवडणाऱ्या विद्यार्थ्यांच्या अर्जाची पडताळणी संबंधित ई-स्क्रूटिनी केंद्रामार्फत पूर्णपणे ऑनलाइन केली जाणार असून, त्यासाठी विद्यार्थ्यांना प्रत्यक्ष उपस्थित राहण्याची आवश्यकता नाही. तर फिजिकल स्क्रूटिनीचा पर्याय निवडणाऱ्या विद्यार्थ्यांना जवळच्या स्क्रूटिनी सेंटर (SC) किंवा फॅसिलिटेशन सेंटर (FC) येथे प्रत्यक्ष जाऊन कागदपत्रांची पडताळणी करून घ्यावी लागणार आहे.
MAH CET २०२६ परीक्षा दिलेल्या विद्यार्थ्यांना प्रवेश नोंदणीसाठी कोणतेही शुल्क भरावे लागणार नाही. मात्र, NRI, OCI, PIO, आखाती देशांतील भारतीय कामगारांची मुले तसेच परदेशी नागरिक या प्रवर्गातील उमेदवारांना सक्षम प्राधिकरणाने निर्धारित केलेले शुल्क भरावे लागेल. एकदा भरलेले शुल्क परत करण्यात येणार नाही.
विद्यार्थ्यांनी प्रवेश प्रक्रियेसाठी www.mahacet.org या संकेतस्थळावर ऑनलाइन अर्ज करावा, तसेच प्रवेशासंदर्भातील सर्व अद्ययावत माहिती नियमितपणे संकेतस्थळावर तपासावी, असे सीईटी कक्षाने स्पष्ट केले आहे.
प्रवेशाचे महत्त्वाचे वेळापत्रक
- ऑनलाइन नोंदणी व कागदपत्रे अपलोड : २ जुलै ते १६ जुलै २०२६ (सायं. ५ वाजेपर्यंत)
- ई-स्क्रूटिनी / फिजिकल स्क्रूटिनी : ३ जुलै ते १७ जुलै २०२६ (सायं. ५ वाजेपर्यंत)
- तात्पुरती गुणवत्ता यादी : १९ जुलै २०२६
- हरकती व तक्रारी दाखल करण्याची मुदत : २० ते २२ जुलै २०२६ (सायं. ५ वाजेपर्यंत)
- अंतिम गुणवत्ता यादी : २४ जुलै २०२६
आतापर्यंतची प्रवेश नोंदणी
११ जुलै २०२६ पर्यंत अभियांत्रिकी (BE/B.Tech) अभ्यासक्रमासाठी २ लाख २८ हजार ५३६, तर एमबीए/एमएमएस (MBA/MMS) अभ्यासक्रमासाठी ४८ हजार २५८ विद्यार्थ्यांनी प्रवेश नोंदणी पूर्ण केली असून, दोन्ही अभ्यासक्रमांसाठी मिळून २ लाख ७६ हजार ७९४ विद्यार्थ्यांची नोंदणी झाली आहे.
