बुलढाण्यातील जिल्हा परिषद शाळेची गणितात जागतिक झेप

एज्युवार्त न्यूज नेटवर्क 

बुलढाणा जिल्ह्यातील खामगाव तालुक्यातील कदमापूर येथील जिल्हा परिषद (Zilla Parishad Kadamapur, Buldhana District)  मराठी उच्च प्राथमिक शाळेने गणित शिक्षणात क्रांती घडवली आहे. इयत्ता चौथीच्या विद्यार्थ्यांना (4th Standard Students) अवघ्या १० ते १५ सेकंदात गुणाकार, भागाकार, बेरीज-वजाबाकीची स्वतः पडताळणी करता येईल, अशी अभिनव पद्धत उपक्रमशील शिक्षक राजेश कोगदे यांनी विकसित केली आहे. येथील विद्यार्थ्यांनी जर्मनीसह इतर देशातील विद्यार्थांशी थेट संवाद (Direct interaction with foreign students) साधला आहे. 

या पद्धतीची जागतिक स्तरावर दखल घेण्यात आली असून जर्मनीसह विविध देशांतील विद्यार्थ्यांशी ऑनलाइन संवादातून या शाळेतील विद्यार्थी ज्ञानाची देवाणघेवाण करत आहेत. इतकेच नाही तर विद्यार्थ्यांनी सुरू केलेली डिजिटल बचत बँक, ऑनलाइन पेमेंटचे प्रशिक्षण, बुद्धीबळ, विज्ञान प्रयोगशाळा, संगणक बायनरी कोडद्वारे गणित सोडवण्याचे प्रयोग यामुळे ही शाळा ग्रामीण भागातील आधुनिक शिक्षणाचा आदर्श ठरत आहे. 

या कारणामुळे बुलढाणा जिल्ह्यातील कदमापूर जिल्हा परिषद शाळेचे नाव आंतरराष्ट्रीय स्तरावर पोहोचले आहे. शाळेच्या या कौतुकास्पद कामगिरीमुळे शाळेतील
 शिक्षक, विद्यार्थी व पालकांवर सर्व स्तरावर कौतुकाचा वर्षाव होत आहे. याशिवाय ही शाळा राज्यातील इतर शाळांसाठी आदर्श ठरली आहे.विद्यार्थ्यांच्या या कामगिरीमुळे गावाचा अभिमान उंचावला असून संपूर्ण शाळेतील शिक्षक व विद्यार्थ्यांमध्ये एक वेगळाच उत्साह निर्माण झाला आहे. इयत्ता चौथीच्या वर्गात शिकणाऱ्या या चिमुकल्यांच्या कुटुंबाची आर्थिक परिस्थिती अतिशय हलाकीची आहे. मात्र, तरीही त्यांच्या मेहनतीने आणि दृढ निश्चयाने हा नवीन इतिहास रचला आहे. विद्यार्थ्यांच्या या शैक्षणिक क्रांतीमध्ये शिक्षक राजेश कोगदे यांचा मोलाचा वाटा आहे.