केंद्रीय विद्यालयामध्ये खासदार कोटा पुन्हा सुरू होणार का? 

एज्युवार्ता न्यूज नेटवर्क 

केंद्रीय विद्यालयामधील (Kendriya Vidyalaya) प्रवेशासाठी खासदारांना विवेकाधीन कोटा पुन्हा सुरू होणार का ? या प्रश्नाचे उत्तर शिक्षण मंत्रालयाकडून संसदेत देण्यात आले आहे. हा कोटा सुरू करण्याचा कोणताही प्रस्ताव नसल्याचे शिक्षण राज्यमंत्री जयंत चौधरी (Minister of State for Education Jayant Chaudhary) यांनी सांगितले. शिवसेनेच्या (उद्धव बाळासाहेब ठाकरे गट) खासदार प्रियांका चतुर्वेदी (Priyanka Chaturvedi)यांनी राज्यसभेत विचारलेल्या लेखी प्रश्नाला उत्तर देताना ही माहिती देण्यात आली. 

चौधरी म्हणाले, "खासदारांच्या कोट्यासह काही विशेष तरतुदींतर्गत मंजूर संख्येपेक्षा जास्त विद्यार्थ्यांचे प्रवेश देण्यात आले होते. ज्याचा वर्गांमध्ये विद्यार्थी-शिक्षक गुणोत्तर (पीटीआर) वाढल्यामुळे अभ्यासावर विपरित परिणाम होत होता. सध्या खासदारांसाठी कोटा पुन्हा सुरू करण्याचा कोणताही प्रस्ताव नाही."

विशेष तरतुदींनुसार खासदारांना 10 मुलांना केंद्रीय विद्यालयात प्रवेश देण्याची शिफारस करण्याचा विवेकाधिकार होता. एका जिल्हा दंडाधिकाऱ्यालाही केंद्रीय विद्यालयांमध्ये प्रायोजक प्राधिकरण कोट्याअंतर्गत १७ विद्यार्थ्यांची शिफारस करण्याचा अधिकार होता. लोकसभेतील 543 खासदार आणि राज्यसभेतील 245 खासदार मिळून वर्षभरात कोट्याअंतर्गत 7 हजार 880 प्रवेशांची शिफारस करू शकत होते. मात्र  केंद्राने 2022 मध्ये हा कोटा रद्द केला.