विद्यापीठाच्या कुलसचिवपदी कोणाची वर्णी लागणार? आजपासून मुलाखती

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University) कुलसचिव (Registrar) पदासाठी पात्र उमेदवारांच्या मुलाखती १० व ११ जुलै रोजी घेतल्या जाणार आहेत.त्यामुळे लवकरच विद्यापीठाला पूर्णवेळ कुलसचिव (Full Time Registrar)मिळणार आहेत. कुलसचिव पदी कोणाची वर्णी लागणार याबाबत अनेक तर्कवितर्क बांधले जात आहेत.त्यात पुण्यातील एका नामांकित महाविद्यालयातील प्राध्यापकाचे नाव आघाडीवर असलेची चर्चा शिक्षण वर्तुळात केली जात आहे.

विद्यापीठाचे माजी कुलसचिव डॉ.प्रफुल्ल पवार (Dr.Prafful Pawar)यांचा कार्यकाळ संपल्यानंतर विद्यापीठाच्या आंतरराष्ट्रीय केंद्राचे संचालक डॉ.विजय खरे (Dr.vijay khare) यांच्याकडे प्रभारी कुलसचिव पदाचा पदभार सोपविण्यात आला. लोकसभा निवडणूक आचारसंहिता व इतर कारणांमुळे कुलसचिव पदाची निवड प्रक्रिया सुमारे सात महिने रखडली होती.मात्र, आता कुलसचिव पदासाठी अर्ज केलेल्या ३६ उमेदवारांपैकी पात्र उमेदवारांच्या मुलाखती घेऊन एका उमेदवाराची पूर्णवेळ कुलसचिव म्हणून नियुक्ती केली जाणार आहे. बुधवारी व गुरूवारी अशा दोन दिवस या मुलाखती घेटाळ्या जाणार आहेत. विद्यापीठाचे कुलगुरू डॉ.सुरेश गोसावी यांच्यासह व्यवस्थापन परिषद सदस्य डॉ.नितीन घोरपडे व कुलसचिव निवड समितीतील इतर सदस्य या मुलाखती घेणार आहेत.

 गेल्या काही महिन्यांपासून विद्यापीठ कोणत्या न कोणत्या कारणामुळे चर्चेत राहिले आहे. त्यात दोन विद्यार्थी संघटनांमधील वाद, पंतप्रधान नरेंद्र मोदी यांच्याविषयी लिहिलेला आक्षेपार्ह शब्द, ललित कला केंद्रातील वादग्रस्त नाटक , विद्यापीठात सापडलेला गांजा अशा अनेक कारणांमुळे विद्यापीठ चर्चेत राहिले.त्यामुळे विद्यापीठाच्या कुलसचिव पदावर काम करणे सोपे राहिले नाही.विद्यार्थ्यांचे अनेक प्रलंबित प्रश्न प्रशासनाने सोडवले नाहीत. अपुऱ्या मनुष्यबळामुळे विद्यापीठातील कर्मचारी त्रास असून कर्मचाऱ्यांचे प्रश्न सुध्दा गंभीर आहेत.त्यामुळे कुलसचिव पदाची माळ ही काटेरी मुकुटापेक्षा कमी नाही. त्यामुळे आता ही माळ कोणाच्या गळ्यात पडणार हे पाहणे उत्सुकतेचे ठरणार आहे.

--------------------------------

कमी वेतनावर काम करण्यासाठी कोण येणार ..  

कुलसचिव पद हे प्रशासकीय पद आहे. प्राध्यापक पदापेक्षा कुलसचिव पदाला कमी वेतन आहे. त्यामुळे कुलसचिव पदी नियुक्त झाल्यानंतर काम करण्यास येणाऱ्या व्यक्तीला कमी वेतनावर काम करण्याची तयारी ठेवावी लागणार आहे. विद्यापीठाचे माजी कुलसचिव डॉ. प्रफुल्ल पवार यांच्या वेतनाचा मुद्दा बराच गाजला होता. विविध संघटनांनी आंदोलने केली होती. एकूण कुलसचिव पदाच्या वेतनावरून बराच वादंग निर्माण होता.त्यामुळे प्राध्यापक म्हणून मिळणारे अधिक वेतन सोडून कमी वेतनावर काम करण्यास कोण येणार, हे लवकरच स्पष्ट होणार आहे.