अल्पवयीन मुलाला विश्वास घेऊन खाजगी कोचिंग शिक्षकाने विद्यार्थ्यासोबत नको ते कृत्य केलं

एज्युवार्ता न्यूज नेटवर्क 

रायगड जिल्ह्यातील महाडमध्ये (Mahad Crime News) अत्यंत संतापजनक आणि धक्कादायक घटना उघडकीस आली. गुरुशिष्याच्या पवित्र नात्याला यामुळे काळीमा फासण्यात आल्याचे पाहायला मिळाले. महाडमध्ये एक खाजगी शिकवणी चालवणाऱ्या शिक्षकाने (Private tutoring teacher) आपल्या विश्वासात असलेल्या अल्पवयीन विद्यार्थ्यावर लैंगिक अत्याचार (Sexual Assault on a Student) केला. या प्रकरणामुळे जिल्ह्यात एकच खळबळ उडाली आहे.

प्राथमिक माहितीनुसार, सुनील गांधी असे आरोपी शिक्षकाचे नाव असून, तो महाड परिसरात खाजगी शिकवणी वर्ग चालवत होता. परिसरातील अनेक विद्यार्थी त्याच्याकडे शिक्षणासाठी येत होते. पीडित मुलगाही त्याच्याकडे नियमित शिकवणीसाठी जात होता. मात्र, शिक्षकाने विद्यार्थ्याच्या विश्वासार्हतेचा गैरफायदा घेत त्याला शिकवणीच्या निमित्ताने आपल्या घरात नेले. तिथं त्याला बेडरूममध्ये नेऊन त्याच्याशी अश्लील वर्तन केले, असा गंभीर आरोप तक्रारीमध्ये करण्यात आला आहे. 

घटनेनंतर पीडित मुलगा मानसिकदृष्ट्या हादरलेला होता. काही काळ तो भीतीपोटी शांत राहिला. मात्र, अखेर त्याने मोठ्या धाडसाने हा प्रकार आपल्या पालकांना सांगितला. मुलाने सांगितलेल्या घटनाक्रमानंतर त्याच्या कुटुंबीयांना मोठा धक्का बसला आणि त्यांनी तातडीने महाड पोलीस ठाण्यात आरोपीविरोधात तक्रार नोंदवली. या तक्रारीच्या आधारे महाड पोलिसांनी आरोपी सुनील गांधी याच्याविरोधात ‘पॉक्सो’ (POCSO) कायद्यांतर्गत गुन्हा दाखल केला. 

पोलिसांनी या घटनेची गंभीर दखल घेत पुढील तपास सुरू केला करत आरोपीचा शोध सुरू केला आहे. या घटनेमुळे महाड परिसरात संतापाचे वातावरण निर्माण झाले असून, पालकांमध्ये भीतीचे वातावरण पसरले आहे.