CET Cell : PCM परीक्षेची सिटी स्लिप जारी, परीक्षा वेळापत्रकात बदल.. 

एज्युवार्त न्यूज नेटवर्क 

महाराष्ट्र राज्य सामायिक प्रवेश परीक्षा कक्षाने (State Common Entrance Test Cell) एमएचटी सीईटी २०२६ परीक्षेबाबत (MHT CET 2026) महत्त्वाची अपडेट समोर आली आहे. सीईटी सेलने उमेदवारांसाठी परीक्षा शहर स्लिप (Exam City Slip ​release) प्रसिद्ध केली आहे. राज्यातील लाखो विद्यार्थ्यांनी या परीक्षेसाठी अर्ज केला असून, आता उमेदवारांची परीक्षा ११ एप्रिलपासून आयोजित करण्यात आली आहे. त्यापूर्वी सीईटी सेलने (CET Cell) त्यांचे अधिकृत संकेतस्थळ https://cetcell.mahacet.org/ वर परीक्षेची सिटी स्लिप जारी केल्या आहेत. यामुळे परीक्षार्थी त्यांची परीक्षा कोणत्या शहरात होणार आहे याची माहिती सहजपणे तपासू शकतात.

दरम्यान, १२ एप्रिल २०२६ रोजी काही राष्ट्रीय स्तरावरील महत्त्वाच्या परीक्षा नियोजित असल्यामुळे अनेक उमेदवारांनी सीईटी कक्षाला परीक्षा पुढे ढकलण्याची मागणी केली होती. या मागण्यांचा गांभीर्याने विचार करून सीईटी सेलने PCM ग्रुपच्या परीक्षांच्या वेळापत्रकात बदल करण्याचा निर्णय घेतला आहे. सुधारित वेळापत्रकानुसार, ही परीक्षा आता ११ एप्रिल २०२६ पासून सुरू होणार असून १२ एप्रिल हा दिवस वगळून २० एप्रिल २०२६ पर्यंत घेतली जाणार आहे.

परीक्षेच्या शहराची प्राथमिक माहिती देणारी शहर स्लिप उपलब्ध झाली असली, तरी उमेदवारांनी लक्षात ठेवावे की, ही स्लिप अंतिम प्रवेशपत्र नाही. परीक्षा केंद्राचे अचूक नाव, पत्ता, परीक्षा दिनांक व वेळ यासारखी सविस्तर माहिती प्रवेशपत्रामध्येच दिली जाणार आहे. सीईटी सेलने जाहीर केल्यानुसार, परीक्षेचे प्रवेशपत्र ७ एप्रिल २०२६ पासून विद्यार्थ्यांना डाउनलोडसाठी उपलब्ध होणार आहे.

विद्यार्थ्यांनी वेळेवर शहर स्लिप व प्रवेशपत्र डाउनलोड करून त्यातील सर्व माहिती काळजीपूर्वक तपासावी, तसेच परीक्षेसाठी आवश्यक तयारी पूर्ण ठेवावी, असे आवाहनही सीईटी सेलतर्फे करण्यात आले आहे.