देशातील पहिले सहकार विद्यापीठ गुजरातमध्ये; अमित शहांच्या हस्ते भुमिपूजन 

एज्युवार्ता न्यूज नेटवर्क 

गुजरात राज्यातील आणंद येथे देशातील पहिले राष्ट्रीय सहकारी विद्यापीठ (First National Cooperative University) स्थापन करण्यात येणार आहे. केंद्रीय गृहमंत्री अमित शाह (Home Minister Amit Shah) यांच्या हस्ते या विद्यापीठाचा भुमिपूजन समारंभ (Groundbreaking ceremony) पार पडला. यावेळी बोलताना शाह म्हणाले, हे विद्यापीठ सहकार क्षेत्रातील घराणेशाहीचा अंत करेल तसेच या क्षेत्रात असलेला प्रशिक्षणाचा अभाव दूर करण्याचे कामदेखील हे विद्यापीठ करणार असल्याचे त्यांनी सांगितले. आणंद कृषी विद्यापीठाच्या परिसरात हा समारंभ पार पडला. 

शिक्षण सरकारी शिष्यवृत्तीवर परदेशात शिक्षण घेणारे ९० टक्के विद्यार्थी तिकडेच स्थायिक

भारतातील सहकार चळवळीचे प्रणेते व अमूलची स्थापना करण्यात मोलाची कामगिरी बजावणारे त्रिभुवनदास किशीभाई पटेल यांचे नाव या सहकारी विद्यापीठाला देण्यात आले आहे. १२५ एकर जमिनीवर ५०० कोटी रुपये खर्च करून सदर विद्यापीठाची उभारणी करण्यात येईल. अमित शाह म्हणाले की, सहकार क्षेत्रात पूर्वी भरती करून त्यानंतर सदर कर्मचाऱ्यांना प्रशिक्षण दिले जात होते. पण, यापुढे असे होणार नाही. आता फक्त प्रशिक्षित व्यक्तींनाच सहकार क्षेत्रात नोकऱ्या मिळणार आहेत.

भारतातील सहकार क्षेत्रात ३० कोटींहून अधिक लोक सहभागी आहेत. म्हणजे दर चौथा भारतीय व्यक्ती या क्षेत्राशी संबंधित आहे. मात्र, सहकार क्षेत्रामध्ये योग्य प्रशिक्षणाचा अभाव आहे. ती कमतरता हे विद्यापीठ भरून काढेल. भारताकडे प्रतिभेची, बुद्धिमान लोकांची कमतरता नाही. मात्र, आता आपल्याला प्रशिक्षित अधिकारी, तज्ज्ञ, कार्यकर्ते यांची फळी निर्माण करण्याची आवश्यकता आहे. ते काम हे विद्यापीठ करणार आहे, असे गृहमंत्री अमित शाह यांनी सांगितले.