विद्यार्थिनींसमोर कपडे काढायचा, नग्न होऊन डान्स करायचा; ZP शाळेतील किळसवाणा प्रकार
बीड जिल्ह्यातील गेवराई येथील जिल्हा परिषद प्राथमिक शाळेत किळसवाणा प्रकार समोर आला आहे. येथील चौथीत शिकणाऱ्या चार विद्यार्थिनींसोबत एका नराधम शिक्षकाकडून गैरवर्तन झाल्याचा गंभीर प्रकार उघडकीस आला आहे.
Eduvarta
एज्युवार्ता न्यूज नेटवर्क
बीड जिल्ह्यातील गेवराई येथील जिल्हा परिषद प्राथमिक शाळेत किळसवाणा प्रकार समोर आला आहे. येथील शाळेत शिकणाऱ्या चार विद्यार्थिनींसोबत एका नराधम शिक्षकाकडून गैरवर्तन झाल्याचा गंभीर प्रकार उघडकीस आला आहे. संबंधित शिक्षकाने मुलींसमोर कपडे काढून नाचणे आणि त्यांना अयोग्य पद्धतीने स्पर्श करणे असे कृत्य केल्याचा आरोप आहे. या प्रकरणी गेवराई पोलिसांनी शिक्षकास अटक केली आहे.
मिळालेल्या माहितीनुसार, लुखामसला येथील शाळेत अविनाश ढेरे हा आरोपी शिक्षक कार्यरत आहे. त्याच्याविरोधात शाळेत शिक्षण घेणाऱ्या विद्यार्थिनींनी गैरवर्तनाची तक्रार दाखल केली आहे. मुलींनी घरी जाऊन पालकांना हा प्रकार सांगितल्यानंतर घटना समोर आली. संतप्त पालक शाळेत पोहोचले आणि संबंधित शिक्षकाला जाब विचारला. या घटनेमुळे परिसरात संतापाचे वातावरण निर्माण झाले.
घटनेची माहिती मिळताच गेवराई पोलिसांनी लुखामसला येथे धाव घेतली आणि आरोपी शिक्षकास ताब्यात घेतले. पालकांच्या तक्रारीवरून पोक्सो कायदा आणि विनयभंगासंदर्भातील तरतुदींनुसार गुन्हा दाखल करण्यात आला आहे. त्यानंतर आरोपीला अटक करण्यात आली.
या घटनेची माहिती गावात पसरल्यानंतर ग्रामस्थांनी कठोर कारवाईची मागणी केली. गुन्हा दाखल करून आरोपीला शिक्षा व्हावी या मागणीसाठी मोठ्या संख्येने नागरिक गेवराई पोलीस ठाण्यात जमले होते. पोलिसांनी अटक करण्यात आलेल्या शिक्षकास न्यायालयात हजर केले जाणार असल्याचे सांगितले आहे.
या प्रकरणाचा पुढील तपास सुरू आहे. विद्यार्थिनींच्या तक्रारी आणि आरोपांची कायदेशीर प्रक्रियेनुसार चौकशी केली जाणार आहे. अल्पवयीन मुलींशी संबंधित प्रकरण असल्याने त्यांच्या ओळखीची माहिती गोपनीय ठेवणे महत्त्वाचे आहे. पोलिसांकडून तपासाचे काम सुरू असून, न्याय्य कारवाईची अपेक्षा व्यक्त केली जात आहे.
