हिंदी विभागाने घेतली नियमबाह्य परीक्षा; विद्यार्थ्याचा निकाल ठेवला राखून

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University) हिंदी विभागाने (Department of Hindi) एका विद्यार्थ्यांची नियमबाह्य पध्दतीने परीक्षा घेतल्याची धक्कादायक माहिती समोर आली आहे. त्यामुळे केवळ विद्यापीठाशी संलग्न महाविद्यालयांकडूनच परीक्षेच्या कामात चूका होतात, असे नाही तर विद्यापीठातील विभागाकडूनही गंभीर चूका केल्या जात असल्याचे उघड झाले आहे.हिंदी विभागाने धवल बारेवार या विद्यार्थ्यांची (Hindi Department Dhaval Borewar student)परीक्षा (Examination of students)घेतल्यानंतर अद्याप त्याचा निकाल जाहीर केला नाही.मग त्याची परीक्षा का घेतली? असा सवाल उपस्थित होत आहे. 

धवल बारेवार हा एम.ए.साहित्य द्वितीय वर्षातील विद्यार्थी असून तो परीक्षेदरम्यान आजारी होता.आजारी असल्याने तो दोन विषयाची परीक्षा देऊ शकला नाही.त्यामुळे त्याने विभागाकडे माझी पुन्हा परीक्षा घ्यावी,अशी विनंती केली. परंतु, विद्यापीठ कायद्यानुसार विद्यार्थ्यांची परीक्षा घेण्याचे अधिकार हे परीक्षा व मूल्यमापन मंडळ संचालक यांना देण्यात आले आहेत. एकदा परीक्षा आयोजित केल्यानंतर जर दुसऱ्यांदा परीक्षा घ्यावयाची असेल तर ही परीक्षा काशी घ्यावी,याबाबत विद्यापीठ कायद्यात तरतूद करण्यात आली आहे. परीक्षेच्या काळात एखादा विद्यार्थी राष्ट्रीय स्पर्धेत सहभागी असल्यास किंवा काही सांस्कृतिक कार्यक्रमात सहभागी असेल तरच संबंधित विद्यार्थ्यांची परीक्षा घेता येते. एखादा विद्यार्थी परीक्षा कालावधीत आजारी होता म्हणून विभाग प्रमुखांना त्याची परीक्षा घेण्याचे अधिकार विद्यापीठ कायद्यात नाहीत. 

धवल बारेवार या विद्यार्थ्यांची परीक्षा घेण्याबाबत विभागात चर्चा झाली होती. त्यातून प्रशासनाची मान्यता घेऊन परीक्षा घ्यावी, असे समोर आले होते. तसेच  विभागातर्फे प्र- कुलगुरू यांना याबाबत पत्र लिहिण्यात आले होते. त्यांनी विभागस्तरावर प्रचलित नियमानुसार कार्यवाही करावी, असे आदेश दिले होते.मात्र, प्रचलित कार्यपध्दती व प्रशासनाची मान्यता न घेता हिंदी विभागाने धवल बारेवार याची परीक्षा घेतली. त्यामुळे हिंदी विभागाने घेतलेल्या नियमबाह्य परीक्षेची चौकशी विद्यापीठाच्या परीक्षा विभागातर्फे करण्यात आली. परीक्षा व मूल्यमापन मंडळ कार्यालयातील संचालक डॉ.महेश काकडे, हिंदी विभाग प्रमुख डॉ. विजायकुमार रोडे यांच्यासह विभागातील प्राध्यापक तसेच परीक्षा विभागातील अधिकारी या बैठकीस उपस्थित होते.सर्व बाबी तपासल्यानंतर प्रचलित आदेश क्रमांक 163 नुसार हे प्रकरण नियमबाह्य ठरवण्यात आले. 

 वैद्यकीय कारणांमुळे विशेष परीक्षा घेण्यासाठी कुलगुरू यांचे आदेश घ्यावे लागतात. विभागाला एकाच विद्यार्थ्यांची अशी परीक्षा घेता येत नाही. कुलगुरू यांनी याबाबत निर्णय घेतल्यानंतर तो विद्या परिषदे पुढे व परीक्षा व मूल्यमापन मंडळा पुढे सादर करावा लागतो.ही प्रक्रिया विभागाने पूर्ण केली नाही.त्यामुळे या विद्यार्थ्यांची परीक्षा घेता येत नाही.त्यामुळे या विद्यार्थ्यांचा निकालही जाहीर करता येणार नाही, असा निष्कर्ष आता समोर आला आहे.त्यामुळे या सर्व घटनेची चौकशी विद्यापीठ स्थरावर होणार का ? असा सवाल उपस्थित होत आहे.