संगणक टायपिंग प्रमाणपत्र परीक्षा जून 2024 चा निकाल जाहीर..

एज्युवार्ता न्यूज नेटवर्क 

महाराष्ट्र राज्य परीक्षा परिषदेमार्फत (Maharashtra State Examination Council) शासकीय संगणक टायपिंग प्रमाणपत्र परीक्षा (Govt Computer Typing Certificate Exam) (GCC-TBC) जून-2024 चा निकाल ऑनलाइन पद्धतीने जाहीर (Results announced)  करण्यात आला आहे. सदरील परीक्षेचा निकाल परिषदेच्या www.mscepune.in या संकेतस्थळावर विद्यार्थ्यांना पाहाता येणार आहे. इंग्रजी, मराठी व हिंदी 30/40 शब्द प्रति मिनिट या विषयांची परीक्षा 10 जून ते 21 जून 2024 या कालावधीत ऑनलाइन पद्धतीने घेण्यात आली होती. 

विद्यार्थ्यांची प्रमाणपत्रे डिजिटल स्वाक्षरीने ऑनलाईन स्वरूपात संबंधित संस्थांच्या लॉगिनला उपलब्ध करून देण्यात येणार आहेत. सदरील प्रमाणपत्रांची छपाई संस्थांनी कलर प्रिंट द्वारे 100GSM कागदावर करून विद्यार्थ्यांना मोफत वितरित करावे लागणार आहे. तसेच संबंधित वि‌द्यार्थ्यास सॉफ्ट कॉपी PDF स्वरूपात देण्यात यावी, जेणेकरून विद्यार्थ्यांना भविष्यात प्रमाणपत्राच्या आवश्यकतेनुसार सदरील प्रमाणपत्र कलर प्रिंट द्वारे 100GSM कागदावर छपाई करून घेता येईल. संस्थांनी संबंधित विद्यार्थ्यास प्रमाणपत्र वितरित केलेली पोहोच दप्तरी जतन करून ठेवावी, असे परीक्षा परिषदेने नमुद केले आहे. 

निकाल जाहीर झालेल्या दिनांकापासून 10 दिवसात उमेदवारांनी गुण पडताळणी व उत्तरपत्रिकेच्या छायांकित प्रतीसाठी संस्थेमधून विहित नमुन्यात ऑनलाईन अर्ज करणे आवश्यक आहे. गुण पडताळणीसाठी प्रति विषय100 रुपये प्रमाणे व छायाप्रतीसाठी प्रति विषय 400 रुपये प्रमाणे रक्कम ऑनलाईन पद्धतीने 26 ऑगस्टपर्यंत भरणे आवश्यक आहे. गुण पडताळणी व छायाप्रती प्राप्त झाल्यानंतर कार्यालयीन पाच दिवसात पुनर्मूल्यांकनासाठी प्रति विषय 600 रुपये प्रमाणे ऑनलाईन पद्धतीने रक्कम भरून अर्ज करता येईल. याबाबतच्या सविस्तर सूचना परिषदेच्या www.mscepune.in या संकेतस्थळावर देण्यात आलेल्या आहेत.