शिक्षकांच्या मागण्या मान्य, आंदोलन मागे; ऑगस्ट महिन्यात वाढ

एज्युवार्ता न्यूज नेटवर्क

जुलैपासून सर्व खासगी अंशतः अनुदानित शाळांना टप्पा वाढ (School grant increase) करण्यात येईल. ही वाढ शिक्षकांना ऑगस्टच्या वेतनामध्ये मिळेल, असे आश्वासन मुख्यमंत्री देवेंद्र फडणवीस यांनी आंदोलक शिक्षकांना दिले. त्यानंतर आझाद मैदानात (Mumbai Azad Maidan) एकवटलेल्या हजारो शिक्षकांनी आंदोलन मागे घेण्याचा निर्णय घेतला. राज्यातील जवळपास ५ हजार ८४४ खासगी अंशत: अनुदानित शाळांना (5,844 private partially aided schools) टप्पा अनुदान मिळावे यासाठी या शाळांमधील जवळपास २५ हजार शिक्षक गेली तीन दिवस आझाद मैदानावर ठाण मांडले होते. त्या आंदोलनाची दखल घेत अखेर बुधवारी सायंकाळी मुख्यमंत्री देवेंद्र फडणवीस (Chief Minister Devendra Fadnavis) यांनी शिक्षकांच्या शिष्टमंडळाची भेट घेऊन मागण्या मान्य केल्या.

राज्यातील ५ हजार ८४४ खासगी अंशतः अनुदानित शाळांना ऑक्टोबर २०२४ च्या शासन निर्णयाप्रमाणे टप्पा अनुदान लागू करण्यात यावे. यासाठी शिक्षक समन्वय संघामार्फत आझाद मैदानामध्ये ५ जूनपासून आंदोलन पुकारण्यात आले होते. अंशतः अनुदानित शाळांमधील २५ हजार शिक्षक शाळा बंद ठेवून दोन दिवस आझाद मैदानात एकवटले होते. मुख्यमंत्र्यांनी बुधवारी सायंकाळी दिलेल्या आश्वासनानंतर शिक्षकांनी आंदोलन मागे घेतले.

शिक्षकांवर संघर्षाची वेळ येऊ देऊ नका, एक दिवसात प्रश्न मार्गी लावा: आझाद मैदानावर शरद पवार

टप्प्याटप्याने अनुदान देण्याच्या मागणीचा शासन निर्णय निघाल्याने आता फक्त शासनाने अनुदानाचा निधी वर्ग करण्याची आवश्यकता आहे. त्यानुसार जुलै महिन्याचा टप्पा ऑगस्ट महिन्यात वर्ग करण्यात येईल, असे मुख्यमंत्र्यांनी सांगितले आहे. त्यामुळे आंदोलन मागे घेण्यात येत असल्याचे शिक्षक समन्वयक संघाचे अध्यक्ष संजय डावरे यांनी सांगितले.

राष्ट्रवादी काँग्रेस शरद पवार गटाचे अध्यक्ष शरद पवार, जयंत पाटील, जितेंद्र आव्हाड, शिवसेना ठाकरे गटाचे पक्षप्रमुख उद्धव ठाकरे व पदवीधर मतदारसंघांतील काही आमदारांनी आझाद मैदानात आंदोलकांची भेट घेतली. राष्ट्रवादी काँग्रेस शरद पवार गटाचे नेते रोहित पवार यांनी मंगळवारी सायंकाळपासून आझाद मैदानात आंदोलकांसह ठाण मांडला. त्यामुळे या आंदोलनाला राजकीय बळ मिळाले होते. अखेर मुख्यमंत्री देवेंद्र फडणवीस यांनी बुधवारी सायंकाळी दिलेल्या आश्वासनानंतर शिक्षकांनी आंदोलन मागे घेतले.