जात पडताळणीसाठी विशेष मोहीम, 'या' विद्यार्थ्यांना करता येणार अर्ज

एज्युवार्ता न्यूज नेटवर्क 

जात पडताळणी समितीमार्फत (Caste Verification Committee) विशेष मोहिम हाती घेण्यात आली आहे. या मोहिमेअंतर्गत शैक्षणिक वर्ष २०२४-२५ (Academic year 2024-25) मध्ये बारावी विज्ञान शाखेत (12th Science Branch) शिक्षण घेत असलेल्या मागासवर्गीय विद्यार्थ्यांना जात प्रमाणपत्र पडताळणीसाठी (Caste certificate verification) अर्ज दाखल करण्याचे आवाहन करण्यात आले आहे. आत्तापर्यंत जिल्हा जात पडताळणी समितीकडे अर्ज दाखल न केलेल्या विद्यार्थ्यांसाठी ही मोहिम राबवण्यात येणार आहे. 

मुख्यमंत्री देवेंद्र फडणवीस यांनी जाहीर केलेल्या १०० दिवस उद्दिष्ट कार्यक्रमानुसार ही विशेष मोहिम राबवण्यात येत आहेत. त्यामुळे अद्याप अर्ज न केलेल्या विद्यार्थ्यांना ही नामी संधी चालून आली आहे. अनुसूचित जाती, विमुक्त जाती, भटक्या जमाती, इतर मागास वर्ग, विशेष मागास प्रवर्ग व शैक्षणिक व सामाजिकदृष्ट्या मागास प्रवर्ग (मराठा) या मागास प्रवर्गातील विद्यार्थ्यांना जातपडताळणी करणे आवश्यक आहे. 

बारावी विज्ञान शाखेतून उत्तीर्ण झाल्यानंतर विद्यार्थ्यांना वैद्यकीय, अभियांत्रिकी, आर्किटेक्चर, औषधनिर्माण विज्ञान, कृषी, पशुसंवर्धन यांसारख्या व्यावसायिक अभ्यासक्रमांस राखीव जागेवर प्रवेश मिळवण्यासाठी जात प्रमाणपत्राची मदत होते. हे प्रमाणपत्र नसेल तर खुल्या प्रवर्गातून प्रवेश घ्यावा लागतो. त्यामुळे शैक्षणिक नुकसान टाळण्यासाठी जात प्रमाणपत्राची आवश्यता आहे. 

प्रवेश मिळाल्यानंतर देखील सरकारच्या शिक्षण शुल्क, परीक्षा शुल्क प्रतिपूर्ती योजनेचा लाभ घेण्यासाठी विद्यार्थ्यांना जात प्रमाणपत्राची पडताळणी करून घेऊन जातवैधता प्रमाणपत्र सादर करणे आवश्यक असते. त्यामुळे ज्या विद्यार्थ्यांनी त्यांचा जातप्रमाणपत्र पडताळणीचा अर्ज दाखल केला नाही त्यांनी सीसीव्हीआयएस ccvis.barti.in किंवा www.barti.maharashtra.gov.in या संकेतस्थळावर अर्ज करावेत व त्याची छापील प्रत जिल्हा जातप्रमाणपत्र पडताळणी समिती कार्यालयात दाखल करावी, असे आवाहन करण्यात आले आहे.