प्राचार्यांच्या मारहाणीमुळे विद्यार्थ्याची आत्महत्या; सुसाईड नोटमधून गंभीर आरोप
जळगाव जिल्ह्यातून एक धक्कादायक घटना समोर आली आहे. गुलाबराव देवकर महाविद्यालयातील फार्मसीच्या दुसऱ्या वर्षात शिक्षण घेत असलेला विद्यार्थी श्याम प्रभाकर पाटील (वय १९ वर्षे रा. बोदवड) याने गळफास घेऊन आत्महत्या केल्याची धक्कादायक घटना घडली आहे.
eduvarta@gmail.com 
एज्युवार्ता न्यूज नेटवर्क
जळगाव जिल्ह्यातून एक धक्कादायक घटना समोर आली आहे. गुलाबराव देवकर महाविद्यालयातील फार्मसीच्या (Gulabrao Deokar Pharmacy College Jalgaon) दुसऱ्या वर्षात शिक्षण घेत असलेला विद्यार्थी श्याम प्रभाकर पाटील (Student Shyam Prabhakar Patil) (वय १९ वर्षे रा. बोदवड) याने गळफास घेऊन आत्महत्या (Student commits suicide by hanging) केल्याची धक्कादायक घटना घडली आहे. प्राचार्य योगेश पवार यांनी सर्वांसमोर पीव्हीसी पाइपने मारहाण करून अपमानास्पद वागणूक दिल्याने, मानसिक त्रास सहन न झाल्याचा उल्लेख त्याने मृत्यूपूर्वी लिहिलेल्या सुसाईड नोटमध्ये (Crime against principal based on suicide note) केला आहे. या प्रकरणी कुटुंबीयांच्या फिर्यादीवरून संबंधित प्राचार्यांविरुद्ध गुन्हा दाखल करण्यात आला आहे.
मृत्यूपूर्वी लिहिलेल्या पत्रात श्यामने नमूद केले आहे की, कोणतीही चूक नसताना प्राचार्यांनी सर्व शिक्षक आणि मित्रांसमोर त्याला मारहाण केली व शिवीगाळ केली. मित्रांतील भांडणात मध्यस्थी करण्यासाठी गेलो असताना समोरच्या विद्यार्थ्याने बाहेरील मुलांना बोलावले, तरी त्याच्यावर कारवाई झाली नाही; उलट मला पीव्हीसी पाइपने मारण्यात आले, असा आरोप त्याने केला आहे. “गुरू मारतात हे माहीत आहे, पण इतके नाही,” अशी वेदनादायक नोंद त्याने सुसाईड नोटमध्ये केली आहे. पत्राच्या शेवटी मित्राला उद्देशून भावनिक संदेशही लिहिला आहे.
घटनेची माहिती मिळताच जळगाव शासकीय रुग्णालयात नातेवाईक व पालकांनी गर्दी केली. संबंधितांवर गुन्हा दाखल करून अटक केल्याशिवाय मृतदेह ताब्यात घेणार नाही, अशी ठाम भूमिका विद्यार्थ्यांच्या कुटुंबियांनी घेतली. एका होतकरू विद्यार्थ्याला प्राचार्यांच्या जाचाला कंटाळून जीव गमवावा लागल्याची भावना व्यक्त करत वर्गमित्रांनीही संताप व्यक्त केला. आधी या घटनेची आकस्मिक मृत्यूची नोंद करण्यात आली होती. मात्र, मृत विद्यार्थ्याचे वडील प्रभाकर पाटील यांनी दिलेल्या फिर्यादीवरून रामानंदनगर पोलिस ठाण्यात प्राचार्य योगेश पवार यांच्याविरुद्ध गुन्हा दाखल करण्यात आला आहे. पुढील तपास सुरू आहे.
