टो- जुमडा मास कॉपी प्रकरणी 26 कर्मचारी निलंबित; गुन्हा दाखल करण्याचे आदेश 

एज्युवार्ता न्यूज नेटवर्क 

महाराष्ट्र राज्य माध्यमिक उच्च माध्यमिक शिक्षण मंडळातर्फे घेतल्या जात असलेल्या इयत्ता बारावीच्या परीक्षेदरम्यान वाशिम जिल्ह्यातील श्री मौनागिरी महाराज विद्यालय व कनिष्ठ महाविद्यालय टो-जुमडा येथे सामूहिक कॉपी केल्याचे उघड झाल्यानंतर राज्य मंडळांनी तसेच जिल्हा दक्षता समितीने कठोर कारवाई करण्याचा निर्णय घेतला आहे. याप्रकरणी 26 जणांना निलंबित करण्यात आले आहे.तसेच संबंधिताविरोधात पोलिसात गुन्हा दाखल करण्याच्या सूचना देण्यात आल्या आहेत.

इयत्ता बारावीच्या भौतिकशास्त्र विषयाच्या पेपर दरम्यान वाशिम जिल्हा परिषदेचे शिक्षणाधिकारी संजय ससाने यांनी भरारी पथकाच्या माध्यमातून श्री मौनागिरी महाराज विद्यालय व कनिष्ठ महाविद्यालय टो-जुमडा येथे भेट दिली असता या ठिकाणी सामूहिक कॉफीचा प्रकार आढळून आला. परीक्षा केंद्रावर केंद्र संचालक गजानन कावरखे यांच्यासह इतर यांच्यासह पर्यवेक्षक आणि प्रयोगशाळा सहाय्यक अमोल काकडे यांच्याकडे मोबाईल फोन आढळून आला. परीक्षा केंद्रावर केंद्र संचालक, सहाय्यक केंद्र संचालक व पर्यवेक्षक म्हणून काम करत असलेल्या कर्मचाऱ्यांनी परीक्षा केंद्रावरील सर्व परीक्षार्थी विद्यार्थ्यांना कॉपी करण्यास मदत केल्याचे प्रथम दर्शनी सिद्ध झाले. त्यामुळे याप्रकरणी केंद्र संचालक व पर्यवेक्षक यांच्याविरुद्ध गुन्हा दाखल करण्याबाबत विभागीय अध्यक्ष यांना कळविण्यात आले आहे. 

श्री मौनागिरी महाराज विद्यालय व कनिष्ठ महाविद्यालय येथील गजानन कावरखे, एम.डी.ठाकरे, ए. एस. भोयर, ओ.बी. मेटे, व्ही. डब्ल्यू .बिल्लारी, पी.एस.देशमुख, एम.डी. हिवराळे, एस.ए.गोटे,एस. व्ही . चिभाडे, के.डी.खिल्लारे, डी.एस.इढोळे, अमोल काकडे, त्याच प्रमाणे मोहजा येथील माऊली कनिष्ठ महाविद्यालयाचे जी. जे.लोड, पी.व्ही.बलखंडे, एम.के. वानखडे,ए.एस.जाधव, एम.एन दानमोडे तसेच येवती येथील विनायक रावजी मेटे विद्यालयाचे एस.के, भालेराव, एस. एम.जाधव, जी.एस.गिरी, जी. डब्ल्यू.शिंदे, एम.व्ही.शिंदे, व्ही.एम. माळेकर, ए.डब्ल्यू.इंगळे, के.डब्ल्यू, तिरके यांच्यावर निलंबनाची कारवाई करण्याचे आदेश देण्यात आले असून याप्रकरणी पोलिसात गुन्हा दाखल करून कारवाई अहवाल सादर करण्याच्या सूचना देण्यात आल्या आहेत.