ITI Admission : दुसऱ्या फेरीसाठी ४४,६८० विद्यार्थ्यांना जागा वाटप; प्रवेश निश्चितीची मुदत १६ जुलै

एज्युवार्ता न्यूज नेटवर्क

राज्यातील औद्योगिक प्रशिक्षण संस्थांमधील (ITI Admission Process) शैक्षणिक वर्ष २०२६-२७ साठीच्या (Academic year 2026-27) दुसऱ्या प्रवेश फेरीची यादी जाहीर (2nd Admission list announced) करण्यात आली आहे. या फेरीत ४४ हजार ६८० विद्यार्थ्यांना जागा वाटप (Seat allotment for 44,680 students) करण्यात आली आहे. व्यवसाय शिक्षण व प्रशिक्षण संचालनालयाने विद्यार्थ्यांना १६ जुलैपर्यंत (Admission confirmation deadline is July 16th) आवश्यक कागदपत्रांसह संस्थेत जाऊन प्रवेश निश्चित करण्याचे आवाहन केले आहे.

पहिल्या फेरीत ७८ हजार ४९६ विद्यार्थ्यांना प्रवेशाची संधी मिळाली होती, त्यापैकी ४२ हजार २० विद्यार्थ्यांनी प्रवेश घेतला. यात शासकीय आयटीआयमध्ये ३२ हजार ८२६ तर खासगी आयटीआयमध्ये ९ हजार १९४ विद्यार्थ्यांचा समावेश आहे. दुसऱ्या फेरीतील यादी विद्यार्थ्यांच्या लॉगिन आयडीमध्ये उपलब्ध करण्यात आली असून, एसएमएसद्वारेही सूचना देण्यात आली आहे.

प्रवेश प्रक्रियेदरम्यान कागदपत्रांची पूर्तता न करू शकणाऱ्या विद्यार्थ्यांना १५ दिवसांच्या आत सर्व कागदपत्रे सादर करण्याचे लेखी हमीपत्र देऊन प्रवेश घेता येणार आहे. कोणतीही तांत्रिक अडचण आल्यास संबंधित आयटीआय किंवा प्रवेश सहाय्य केंद्राशी संपर्क साधावा, असे संचालनालयाने सांगितले आहे. विद्यार्थ्यांनी प्रवेश वाटप पत्र डाउनलोड करून लवकरात लवकर प्रवेश निश्चित करावा.

तिसऱ्या फेरीसाठी पर्याय अर्ज भरण्याची सुविधा १३ जुलैपासून सुरू होणार आहे. दुसऱ्या फेरीत पसंतीचे ट्रेड किंवा संस्था न मिळालेल्या विद्यार्थ्यांना तिसऱ्या फेरीत पर्याय बदलण्याची संधी मिळणार आहे. यामुळे अधिकाधिक विद्यार्थ्यांना इच्छित ट्रेडमध्ये प्रवेश मिळणे शक्य होईल.

खासगी आयटीआय संस्थांमधील रिक्त जागांसाठीही १३ जुलैपासून संस्थास्तरावरील प्रवेश प्रक्रिया सुरू होणार आहे. राज्यातील ५८६ खासगी आयटीआयंमधील रिक्त जागांवर या फेरीद्वारे प्रवेश दिले जातील. संचालनालयाने विद्यार्थ्यांना नियमितपणे अधिकृत संकेतस्थळ तपासण्याचे आवाहन केले आहे. आयटीआय प्रवेश प्रक्रिया पारदर्शक आणि सुव्यवस्थितपणे पूर्ण करण्यासाठी प्रयत्न सुरू आहेत.