एएनएम-जीएनएम अभ्यासक्रमांसाठी सीईटी अनिवार्य; वैद्यकीय शिक्षण विभागाचा महत्त्वपूर्ण निर्णय 

एज्युवार्ता न्यूज नेटवर्क

राज्यातील सहाय्यक परिचारिका प्रसाविका (एएनएम) आणि सामान्य परिचर्या व प्रसाविका (जीएनएम) पदविका अभ्यासक्रमांसाठी (ANM and GNM Diploma Courses) सामाईक प्रवेश परीक्षा (CET Compulsory) करण्याचा निर्णय वैद्यकीय शिक्षण विभागाने (Medical Education Department) घेतला आहे. ही परीक्षा राज्य सामाईक प्रवेश परीक्षा कक्षामार्फत (CET Cell) घेण्यात येणार असून, पुढील शैक्षणिक वर्षापासून त्याची अंमलबजावणी (Implementation from next year) होणार आहे. या निर्णयामुळे प्रवेश प्रक्रियेत पारदर्शकता (Transparency in the admission process) वाढणार असल्याचे सांगण्यात येत आहे.

सध्या सार्वजनिक आरोग्य विभागाअंतर्गत जीएनएम व एएनएम अभ्यासक्रमांची प्रवेश प्रक्रिया सीईटी कक्षामार्फत होते. मात्र वैद्यकीय शिक्षण विभागाच्या नियंत्रणाखालील वैद्यकीय महाविद्यालयांमध्ये ही प्रक्रिया महाविद्यालयांमार्फत राबवली जाते. यामुळे एकसमान निकषांचा अभाव, पारदर्शकता आणि गुणवत्तेबाबत अडचणी निर्माण होत होत्या. या पार्श्वभूमीवर महाराष्ट्र राज्य शुश्रूषा व परावैद्यक शिक्षण मंडळाच्या ७ ऑक्टोबर २०२५ च्या बैठकीतील निर्णयानुसार शासनाने हा बदल मंजूर केला आहे.

नव्या निर्णयानुसार वैद्यकीय शिक्षण विभागाच्या नियंत्रणाखालील तसेच मंडळाशी संलग्नित सर्व एएनएम आणि जीएनएम महाविद्यालयांमधील प्रवेश राज्य सीईटी कक्षामार्फत घेतल्या जाणाऱ्या सामाईक प्रवेश परीक्षेच्या आधारे होतील. संपूर्ण प्रवेश प्रक्रिया, माहितीपुस्तिका प्रसिद्ध करणे, ऑनलाइन अर्ज, कागदपत्र पडताळणी, गुणवत्ता यादी, जागा निश्चिती आणि वाटप सीईटी कक्षाकडेच राहणार आहे.

उमेदवारांना सीईटी गुण आणि आवश्यक कागदपत्रांच्या आधारे प्रवेश मिळणार आहेत. शासकीय महाविद्यालयांसाठी शासनाने निश्चित केलेले शुल्क धोरण लागू राहील, तर खासगी महाविद्यालयांसाठी शिक्षण शुल्क नियामक प्राधिकरण शुल्क निश्चित करेल. या निर्णयामुळे विद्यार्थ्यांवरील तणाव कमी होईल आणि गुणवत्तापूर्ण प्रवेश प्रक्रिया सुनिश्चित होईल, असे विभागाचे मत आहे.

वैद्यकीय शिक्षण विभागाने या अभ्यासक्रमांच्या परीक्षा घेण्याबाबत सीईटी कक्षाकडे विचारणा केली असून, पुढील शैक्षणिक वर्षापासून ही प्रणाली लागू होणार आहे. नर्सिंग क्षेत्रातील  विकासासाठी हा निर्णय महत्त्वपूर्ण ठरणार असल्याचे शिक्षण क्षेत्रातील तज्ज्ञांचे मत आहे. विद्यार्थ्यांनी अधिकृत संकेतस्थळावरून नियमित अपडेट्स घेण्याचे आवाहन करण्यात आले आहे.