मोठी बातमी: SPPU विद्यापीठाने 'या' कॉलेजची संलग्नता केली रद्द; विद्या परिषदेने दिली मान्यता
महाविद्यालयातील अनियमिततेची चौकशी करण्यासाठी माजी अधिष्ठाता डॉ. संजय तांबट यांची समिती स्थापन केली होती. या समितीने कस्तुरी कॉलेजची संलग्नता काढून घेण्याची शिफारस केली होती.
eduvarta@gmail.com 
एज्युवार्ता न्यूज नेटवर्क
सुमारे दोन वर्षांपासून वेगवेगळ्या कारणामुळे चर्चेत आलेल्या आणि चुकीच्या कृत्यामुळे वादात सापडलेल्या सावित्रीबाई फुले पुणे विद्यापीठाशी संलग्न पुणे जिल्ह्यातील शिक्रापूर येथील कस्तुरी कॉलेजची संलग्नता रद्द करण्याचा निर्णय विद्यापीठाच्या विद्या परिषदेच्या बैठकीत शनिवारी घेण्यात आला. त्यामुळे प्राध्यापक व विद्यार्थी यांना वेठीस धरणाऱ्या मुजोरी कॉलेजला विद्यापीठाने चांगला धडा शिकवला आहे. मात्र, विद्यापीठाच्या व्यवस्थापन परिषदे यावर चर्चा झाल्यानंतर संलग्नात रद्दच्या निर्णयावर अंतिम मोहर उमटणार होणार आहे.
मराठी भाषेला अभिजात भाषेचा दर्जा मिळालेला असताना सावित्रीबाई फुले पुणे विद्यापीठाशी संलग्न असलेल्या कस्तुरी कॉलेजने मराठी विषय बंद केला होता. तसेच महाविद्यालयातील प्राध्यापकांना काढून टाकले होते. एवढेच नाही तर विद्यार्थ्यांवर सुद्धा याबाबत दबाव आणला होता. त्यासंदर्भात काही व्हिडिओ व्हायरल झाले होते. याबाबत विद्यापीठाकडे तक्रार करण्यात आली होती. तसेच विद्यार्थी संघटनांनी या कॉलेजवर कारवाई करण्याची मागणी केली होती. त्यावर विद्यापीठाने या प्रकरणी चौकशी समिती स्थापन केली होती.
मराठी विषय बंद केल्या प्रकरणी विद्यापीठाने समिती स्थापन केली होती. या समितीने विद्यापीठाकडे अहवाल सादर केला होता. एवढेच नाही तर महाविद्यालयातील अनियमिततेची चौकशी करण्यासाठी माजी अधिष्ठाता डॉ. संजय तांबट यांची समिती स्थापन केली होती. या समितीने कस्तुरी कॉलेजची संलग्नता काढून घेण्याची शिफारस केली होती.
डॉ. संजय तांबट यांच्या समितीने कॉलेजची संलग्नता काढून घेण्याची शिफारस केली होती. त्यावर विद्यापीठाच्या विद्या परिषदेच्या बैठकीत चर्चा करण्यात आली. तसेच तांबट समितीने दिलेला अहवाल स्वीकारण्यात आला. त्यामुळे कस्तुरी कॉलेजची संलग्नता रद्द करण्याचा एक टप्पा पूर्ण झाला आहे. नवीन शैक्षणिक वर्ष सुरू होण्यापूर्वी हा निर्णय झाल्याने येत्या शैक्षणिक वर्षापासून विद्यार्थ्यांना प्रवेश देण्यास निर्बंध घातले जाऊ शकतात.
-------------------------
विद्यापीठाकडे डॉ. संजय तांबट यांच्या अध्यक्षतेखाली स्थापन केलेल्या चौकशी समितीचा अहवाल प्राप्त झाला होता. हा अहवाल विद्या परिषदेच्या बैठकीत सादर करण्यात आला. त्यास विद्या परिषदेने मान्यता दिली आहे.
- डॉ. प्रभाकर देसाई, अधिष्ठाता, मानव्यविज्ञान , विद्याशाखा, सावित्रीबाई फुले पुणे विद्यापीठ, पुणे
------------
विद्यार्थी व शिक्षकांना वेठीस धरणाऱ्या आणि मराठी विषय बंद करणाऱ्या कस्तुरी कॉलेजची संलग्नता रद्द करण्याची मागणी कुलगुरू डॉ.सुरेश गोसावी यांनी युवासेनेतर्फे निवेदन देऊन करण्यात आली होती. विद्या परिषदेने याबाबत निर्णय घेतला त्यासाठी विद्यापीठाचे अभिनंदन. मात्र, केवळ कस्तुरी कॉलेजच नाही तर इतरही कॉलेज नियम मोडतात विद्यापीठाने त्यांच्यावरही कारवाई करण्याची धमक दाखवावी.
- कल्पेश यादव, सहसचिव, युवासेना
