धक्कादायक!  कुलगुरू कारभारी काळे यांचा तडका फडकी राजीनामा 

एज्युवार्ता न्यूज नेटवर्क 

लोणेरे येथील डॉ.बाबासाहेब आंबेडकर तंत्रशास्त्र विद्यापीठ अर्थात बाटू विद्यापीठाचे कुलगुरू डॉ.कारभारी काळे (Vice-Chancellor of Dr Babasaheb Ambedkar Technological University, Lonere)यांनी तडका फडकी राजीनामा (resignation)दिल्याचे समोर आले आहे. होमी भाभा विद्यापीठाचे कुलगुरू डॉ.रजनीश कामत यांच्याकडे बाटू विद्यापीठाचा कुलगुरू पदाचा अतिरिक्त कार्यभार सोपविण्यात आला आहे, डॉ.कारभारी काळे यांनी अचानक राजीनामा दिल्यामुळे शिक्षण वर्तुळात जोरदार चर्चा सुरू आहे.दरम्यान काळे यांनी राजीनामा दिल्याच्या वृत्ताला राज्यपाल कार्यालयातील अधिकाऱ्यांकडून दुजोरा मिळाला आहे. 

दहावी नापास भोंदू खरातच्या उच्चशिक्षित भक्तांची यादी वाचून तुम्ही व्हाल थक्क..

डॉ.कारभारी काळे यांनी सावित्रीबाई फुले पुणे विद्यापीठाचा सुमारे एक वर्षाहून अधिक काळ प्रभारी कुलगुरू म्हणून कार्यभार पाहिला होता. त्यांच्या कार्यकाळात कुलगुरू निवासासाठी घेण्यात आलेल्या साहित्य खरेदीवरून मोठा वाद निर्माण झाला होता. त्यात आर्थिक गैरव्यवहार झाल्याची चर्चा होती. काळे यांनी ३१ डिसेंबर २०२१ रोजी त्यांनी 'बाटू' विद्यापीठाच्या कुलगुरू पदाची सूत्रे हाती घेतली होती. राज्यातील सर्व व्यावसायिक महाविद्यालय या विद्यापीठाशी संलग्न आहेत. 

कार्यकाल संपण्यापूर्वी कारभारी काळे यांनी राजीनामा का दिला? ही बाब गुलदस्त्यात आहे. राज्यात यापूर्वीही काही कुलगुरूंनी कार्यकारी संपण्यापूर्वी राजीनामे दिले आहेत. त्यामुळे यापुढील काळात आणखी काही कुलगुरूंना कार्यकाल संपण्यापूर्वी राजीनामे द्यावे लागणार आहेत का ? अशीही चर्चा शिक्षण वर्तुळात केली जात आहे.