RTE च्या विद्यार्थ्यांकडून पुस्तके, गणवेश, साहित्याच्या नावाखाली पैसे घेऊ नका, अन्यथा कारवाई

एज्युवार्ता न्यूज नेटवर्क

आरटीई अंतर्गत प्रवेश (Admission under Rte) घेतलेल्या विद्यार्थ्यांकडून कोणत्याही प्रकारचे शुल्क किंवा पुस्तके, गणवेश, साहित्याच्या नावाखाली पैसे घेऊ नका, (Do not take money) असे निर्देश राज्य सरकारने (Government Directives) राज्यातील सर्व शाळांना दिली आहेत. या नियमांचे उल्लंघन करणाऱ्या शाळांवर कारवाई करण्याचा इशारा शालेय शिक्षणमंत्री दादा भुसे (Education Minister Dada Bhuse) यांनी दिली आहे. या निर्णयामुळे पालकांवरील आर्थिक भार कमी होणार असून, आरटीई अंतर्गत प्रवेश घेतलेल्या पाल्यांना मोठा दिलासा मिळाला आहे. 

राज्यातील खासगी शाळांमध्ये 'मोफत व सक्तीच्या शिक्षणाचा हक्क अधिनियम २००९' अंतर्गत प्रवेश घेतलेल्या विद्यार्थ्यांकडून कोणत्याही प्रकारचे शुल्क वसूल करणे बेकायदेशीर आहे. जर कोणत्याही शाळेने शुल्काच्या किंवा शालेय साहित्याच्या नावाखाली पालकांकडून पैसे घेतले असतील, तर ते पालकांना परत करावे लागतील, अन्यथा संबंधित शाळांवर कठोर कारवाई करण्यात येईल, अशी स्पष्ट भूमिका शालेय शिक्षण मंत्री दादा भुसे यांनी विधानसभेत मांडली.

विधानसभेत सदस्य योगेश सागर यांनी आरटीई प्रवेशातील अडचणी आणि शाळांकडून होणाऱ्या सक्तीच्या वसुलीबाबत लक्षवेधी सूचना मांडली होती. या सूचनेला उत्तर देताना मंत्री भुसे यांनी सरकारची भूमिका स्पष्ट केली. शासनाकडून निधी मिळण्यास उशीर होत असला तरी, त्याचा फटका विद्यार्थ्यांना किंवा पालकांना बसता कामा नये. शाळांनी या कारणास्तव विद्यार्थ्यांकडून पैसे गोळा करणे चुकीचे असल्याचे त्यांनी सांगितले.

"या संदर्भात १ जुलै २०१५ रोजीच राज्य शासनाने स्पष्ट शासन निर्णय निर्गमित केला आहे. शाळांनी कोणत्याही स्वरूपात पालकांकडून शुल्क घेऊ नये, अशा कडक सूचना आधीच देण्यात आल्या आहेत. ज्या शाळा या नियमाचे उल्लंघन करतील, त्यांना कारणे दाखवा नोटीस बजावून त्यांच्यावर कायदेशीर कारवाई केली जाईल," अशी माहिती शालेय शिक्षणमंत्री दादा भुसे यांनी दिली.