CBSE दहावी-बारावी बोर्डाच्या परीक्षांसाठी नोंदणी सुरू
CBSE बोर्ड परीक्षा 2025 साठी नोंदणी करण्याची अंतिम तारीख 4 ऑक्टोबर 2024 आहे.
eduvarta@gmail.com 
एज्युवार्ता न्यूज नेटवर्क
केंद्रीय माध्यमिक शिक्षण मंडळाने (CBSE) 2024 -2025 या शैक्षणिक वर्षासाठी इयत्ता 10वी आणि 12वी बोर्ड परीक्षेसाठी ऑनलाइन नोंदणी प्रक्रिया (Registration process) सुरू केली आहे. जे विद्यार्थी (Students) सध्या सीबीएसई शाळेत इयत्ता 10 वी किंवा 12 वी (10th and 12th) मध्ये शिकत आहेत आणि आगामी CBSE बोर्डाच्या परीक्षेत बसू इच्छितात त्यांना यासाठी नोंदणी करावी लागणार आहे.
संबधित शाळा CBSE परीक्षेचा फॉर्म जमा करेल आणि मुलांची यादी बोर्डाला पाठवेल. ही सर्व ऑनलाइन प्रकिया वेबसाइट parikshasangam.cbse.gov.in वर केली जाणार आहे. विद्यार्थ्यांना स्वतः वेबसाइटवर जाऊन नोंदणी करण्याची गरज नाही. विद्यार्थ्यांना त्यांच्या शाळेशी थेट संपर्क साधावा लागेल आणि तिथेच फी देखील जमा करावी लागेल. ऑनलाइन फॉर्म भरून शुल्क मंडळाकडे जमा करण्याची जबाबदारी संबधित शाळेची असणार आहे.
बोर्डाने शाळांना दिलेल्या सूचनेनुसार, नोंदणी प्रक्रिया 5 सप्टेंबर पासूनच सुरू करण्यात आली आहे. CBSE बोर्ड परीक्षा 2025 साठी नोंदणी करण्याची अंतिम तारीख 4 ऑक्टोबर 2024 आहे. यादरम्यान शाळांना फॉर्म आणि शुल्क जमा करावे लागणार आहे. तथापि, विलंब शुल्कासह CBSE बोर्ड परीक्षेसाठी नोंदणी करण्याची अंतिम तारीख 15 ऑक्टोबर असणार आहे.
10वी/12वी 2024-25 साठी भारतात LOC फी 5 विषय, रु 1500 तर इतर देशात 5 विषयांसाठी 10 हजार रुपये असणार आहे.अतिरिक्त विषयांसाठी भारतात प्रति विषय शुल्क 300 रुपये असेल तर परदेशात प्रति विषय शुल्क 20 हजार रुपये असतील. तसेच विलंब शुल्कासह, वर नमूद केलेल्या सामान्य शुल्काव्यतिरिक्त प्रति विद्यार्थी 2000 रुपये विलंब शुल्क भरावे लागणार आहे. CBSE प्रात्यक्षिक शुल्क (केवळ बारावीसाठी भारत आणि नेपाळमधील शाळांसाठी प्रति विद्यार्थी प्रति विषय १५० रुपये असेल आणि परदेशी शाळांसाठी प्रति विद्यार्थी प्रति विषय 350 रुपये असतील. दृष्टिहीन विद्यार्थ्यांना परीक्षा शुल्क भरण्यापासून सूट देण्यात आली आहे.
दरम्यान, CBSE बोर्डाने आपल्या निवेदनात म्हटले आहे की, "बोर्ड परीक्षेचा फॉर्म भरताना सर्व माहिती काळजीपूर्वक भरा. मार्कशीट आणि रोल नंबर यासारख्या महत्त्वाच्या कागदपत्रांमध्ये ही माहिती वापरली जाईल. चुकीच्या माहितीमुळे समस्या निर्माण होऊ शकतात. पालक आणि मुलांना विषय कोड काळजीपूर्वक तपासण्याचा सल्ला देण्यात आला आहे. ज्या विषयांमध्ये फॉर्म भरला आहे, त्या विषयांचीच परीक्षा मुलांना देता येईल. नंतर कोणतेही बदल करता येणार नाहीत. CBSE परीक्षा 15 फेब्रुवारी 2025 पासून सुरू होतील आणि CBSE डेटशीट नोव्हेंबर किंवा डिसेंबर 2024 मध्ये प्रसिद्ध होईल.
