बी.जे. वैद्यकीय महाविद्यालयात दोन विद्यार्थिनींवर 'रॅगिंग' ; प्रशासनाकडून प्रकरण दडपण्याचा प्रयत्न ?

एज्युवार्ता न्यूज नेटवर्क 

कोणत्या ना कोणत्या कारणाने चर्चेत असणारे पुण्यातील बी. जे. वैद्यकीय महाविद्यालय (B. J. Medical College) पुन्हा एकदा चर्चेचा विषय बनले आहे. कारण इथे उच्च शिक्षण घेणाऱ्या दोन विद्यार्थिनीवर रॅगिंग (Two female students raging) झाल्याची धक्कादायक घटना उघडकीस आली आहे. महिनाभरातील ही दुसरी घटना आहे.रॅगिंग सारखी घटना घडल्यानंतरही महाविद्यालय प्रशासन याबाबत मौन बामळगून आहे.तसेच या प्रकरणावर पडदा टाकण्याचा प्रयत्न करत असल्याचे दिसून येत आहे.

रॅगिंग झालेली एक विद्यार्थिनी महाविद्यालयात क्ष किरणशास्त्र विभागात पदव्युत्तरचे शिक्षण घेत आहे तर, दुसरी भूलशास्त्र विभागात शिक्षण घेत आहे.नामांकित महाविद्यालयात आणि उच्च पदस्थ विद्यार्थिनींसोबत रॅगिंग झाल्याची घटना घडल्याने पुणे शहरासह राज्यभर ही बातमी वाऱ्यासारखी पसरली. मात्र,अशा घटनांमुळे बी.जे. महाविद्यालय आपली प्रतिष्ठा गमावून बसते की काय ? अशी भिती व्यक्त केली जात आहे. 

पदव्युत्तरच्या पहिल्या वर्षातील दोन विद्यार्थिनींनी रॅगिंगची तक्रार महाविद्यालय प्रशासनाकडे केली असून या दोन्ही विद्यार्थिनींनी वरिष्ठ विद्यार्थ्यांकडून त्रास दिला जात असल्याचे त्यांनी आपल्या तक्रारीमध्ये म्हटले आहे. पहिल्या विद्यार्थिनीच्या तक्रारीनंतर रॅगिंग प्रतिबंधक समितीने चौकशी केली. त्यात तक्रारदार विद्यार्थिनी, तिच्या वर्गातील विद्यार्थी, दुसऱ्या वर्षातील विद्यार्थी आणि प्राध्यापकांची चौकशी करण्यात आली. यानंतर चौकशी अहवाल वैद्यकीय शिक्षण विभागाचे आयुक्त राजीव निवतकर यांच्याकडे पाठविण्यात आला.परंतु, अद्याप त्यावर कोणतीही कारवाई झाली नाही.तर दुसऱ्या विद्यार्थिनीच्या तक्रारीवर सध्या चौकशी सुरू आहे.

मागील महिन्यात रॅगिंगची पहिली घटना घडली आहे. याप्रकरणी क्ष-किरणशास्त्र विभागात वैद्यकीय पदव्युत्तरच्या पहिल्या वर्षात शिकणाऱ्या विद्यार्थिनीने तक्रार दिली होती. तिने तक्रार दिल्यानंतर याप्रकरणी रॅगिंग प्रतिबंधक समितीने चौकशी केली. समितीने चौकशी करून आपला अहवाल वैद्यकीय शिक्षण आयुक्तांकडे सादर केला असल्याचे महाविद्यालयाचे म्हणणे आहे.