धक्कादायक: इंजीनिअरिंग प्रवेशाची ऑनलाईन जाहिरात करून 47 लाखांना गंडा ; पाच जणांविरुद्ध गुन्हा दाखल 

एज्युवार्ता न्यूज नेटवर्क 

इंजीनिअरिंग प्रवेशासाठी (Engineering Admission)ऑनलाइन जाहिरात करून आणि नामांकित विद्यापीठांबरोबर टायअप असल्याची खोटी माहिती देऊन सात विद्यार्थ्यांची व पालकांची फसवणूक (Cheating of students)केली असल्याची धक्कादायक माहिती समोर आली आहे. सात विद्यार्थ्यांकडून प्रवेशासाठी तब्बल 47 लाख रुपये उकळण्यात (Fraud of Rs 47 lakh)आले असून याप्रकरणी पाच जणांविरुद्ध पुण्यात चंदननगर पोलीस स्टेशन (Chandannagar Police Station in Pune)येथे गुन्हा दाखल करण्यात आला आहे.

कम्प्युटर सायन्स इंजीनियरिंग अभ्यासक्रमासाठी प्रवेश मिळून देत असल्याचे सांगून पैसे उकळणाऱ्या पाच जणांविरुद्ध राजगोपाल वैष्णव पाणीग्राही (रा. नवी मुंबई) यांनी पोलिसांकडे फिर्याद दिली आहे. पाणीग्राही यांनी दिलेल्या फिर्यादीनुसार शिवम शर्मा उर्फ गोपी कृष्णा, करण लोणकर, विनीन सिंह, प्रियांका कुमारी यांच्यासह अन्य एका व्यक्ती विरोधात गुन्हा दाखल करण्यात आला आहे.

पोलिसांनी दिलेल्या माहितीनुसार फिर्यादी राजगोपाल वैष्णव पाणीग्राही यांच्या मुलीला कम्प्युटर इंजीनियरिंग अभ्यासक्रमासाठी प्रवेश हवा होता. परंतु प्रवेश पूर्व परीक्षांमध्ये तिला अपेक्षित गुण न मिळाल्याने तिला पाहिजे असलेल्या कॉलेजमध्ये प्रवेश मिळत नव्हता. दरम्यान त्यांनी फेसबुकवर एक जाहिरात पाहिली. गेट डायरेक्ट ऍडमिशन टू बी टेक कॉलेजेस असा मजकूर त्यात होता तसेच एक मोबाईल क्रमांकही देण्यात आला होता. दिलेल्या मोबाईल नंबर वर संपर्क केला असता करण लोन कर या व्यक्तीने युवर नेक्स्ट स्टेप या फर्म मधून बोलत असल्याचे सांगितले. त्याचप्रमाणे कॉलेज ऑफ इंजीनियरिंग पुणे (सीओईपी), थापर युनिव्हर्सिटी चंदिगड दिल्ली टेक्निकल युनिव्हर्सिटी आदिनामांकित संस्थांमध्ये मॅनेजमेंट कोट्यातून प्रवेश मिळवून देण्याचे काम फर्म मार्फत केले जात असल्याचे सांगितले.

मुलीला कम्प्युटर इंजिनिअरिंग साठी प्रवेश हवा असल्याचे सांगितल्यानंतर संबंधितांनी वडगावशेरी ,कल्याणी नगर अॅनेक्स, भक्तमार रेसिडेन्सी, पहिला मजला,शॉप नंबर 111, 112 येथे भेटण्यास सांगितले. पाणीग्राही हे त्यांच्या सहकाऱ्यांबरोबर दिलेल्या पत्त्यावर भेटण्यासाठी गेले. त्यावेळी करण लोणकर यांच्याशी त्यांची भेट झाली. मुलीच्या प्रवेशासाठी 15 लाख रुपये खर्च येणार असल्याचे त्यांनी सांगितले. तसेच प्रवेशापूर्वी पाच लाख रुपये देण्याबाबत कल्पना दिली. उर्वरित रक्कम प्रवेश झाल्यानंतर द्यावी लागेल,असे सांगितले. मात्र सर्व रक्कम एकदा देणे शक्य नसल्याने प्रथमतः चार लाख रुपये पाणीग्राही यांनी जमा केले. पैसे जमा करूनही पावती देत नसल्याने पुन्हा संबंधित ऑफिसमध्ये जाऊन दिलेल्या पैशाची पावती त्यांनी घेतली. मात्र, पैसे देऊ नये प्रवेशाबाबत कोणत्याही हालचाली होत नसल्याने आणि उडवा उडवीची उत्तरे मिळत असल्याने पाणीग्राही यांनी पैसे परत मागितले. मात्र, काही दिवसांनी संबंधित व्यक्ती कार्यालय बंद करून तिथून फरार झाले असल्याची धक्कादायक माहिती समोर आली. 

या सर्व प्रकारानंतर ऑनलाइन व ऑफलाइन पद्धतीने पैसे जमा केलेल्या पालकांनी एकत्र येऊन पोलिसांकडे तक्रार दिली. संबंधित व्यक्ती हे वेगवेगळे अकाउंट नंबर वर पैसे जमा करून घेत होते. पाणीग्राही यांची चार लाख रुपयांची फसवणूक झाली असून चतुर्भुज गव्हाणे यांची पाच लाख रुपयांची तर प्रमोद कुमार चंदन यांची नऊ लाख रुपयांची फसवणूक झाली आहे. त्याचप्रमाणे ज्ञानेश शिंदे यांची पाच लाख रुपयांची तर सुनयना कोल्हापूरकर हिची चार लाख रुपयांची फसवणूक झाली आहे. धक्कादायक बाब म्हणजे उज्वला  पाटील यांची तब्बल 15 लाख रुपयांची फसवणूक झाली असून रितेश राठी यांची पाच लाख रुपयांची फसवणूक झाली आहे, याप्रकरणी पोलीस उपनिरीक्षक किरण मोरे तपास करत आहेत.