परदेशात उच्च शिक्षणासाठी खुल्या प्रवर्गातील विद्यार्थ्यांना मिळणार शिष्यवृत्ती

एज्युवार्ता न्यूज नेटवर्क

परदेशात शिक्षण घेऊ इच्छिणाऱ्या विद्यार्थ्यांसाठी महत्वाची बातमी समोर आली आहे. राज्य शासनाच्या (State Government) वतीने परदेशात उच्च शिक्षण (Higher education abroad) घेण्यासाठी खुल्या प्रवर्गातील गुणवंत असलेल्या विद्यार्थ्यांना शिष्यवृत्ती (Scholarships for meritorious students in open category) दिली जाते. यंदाचे शैक्षणिक वर्ष २०२५-२६ साठी उच्च व तंत्र शिक्षण विभागांतर्गत (Department of Higher and Technical Education) गुणवंत विद्यार्थ्यांकडून या शिष्यवृत्तीसाठी ऑनलाइन पद्धतीने अर्ज मागविण्यात आले आहेत. यासाठी ऑनलाइन पद्धतीने अर्ज भरण्याची अंतिम तारीख २५ जून असणार आहे.

शासन निर्णय ४ ऑक्टोबर २०१८ च्या महाराष्ट्र शासनाच्या उच्च व तंत्र शिक्षण विभागाअंतर्गत खुल्या प्रवर्गातील गुणवंत विद्यार्थ्यांना परदेशात उच्च शिक्षणासाठी शिष्यवृत्ती दिली जाते. या योजनेंतर्गत महाराष्ट्र राज्यातील खुल्या प्रवर्गातील गुणवंत विद्यार्थी, पदव्युत्तर पदवी, पदव्युत्तर पदविका व पीएच.डी. अभ्यासक्रमासाठी परदेशातील शैक्षणिक संस्थांमध्ये प्रवेश घेतात, अशा विद्यार्थ्यांना ही शिष्यवृत्ती दिली जाते. त्याबाबतचे निकष उच्च व तंत्र शिक्षण विभागाने निश्चित केले आहेत. शिष्यवृत्तीसाठी शैक्षणिक वर्ष २०२५-२६ करिता ऑनलाइन पद्धतीने अर्ज मागविण्याची प्रक्रिया संचालनालयाच्या https://fs.maharashtra.gov.in/ या संकेतस्थळावरून सुरू केलेली आहे.

विद्यार्थ्यांना या योजनेशी सबंधित सर्व सविस्तर माहिती आणि प्रक्रिया अधिकृत वेबसाईटवरून पाहता येईल.  तसेच ऑनलाइन भरलेल्या अर्जाची प्रत मूळ प्रमाणपत्र कागदपत्रे त्यांच्या साक्षांकित प्रतींसह पडताळणीसाठी संबंधित सहसंचालक विभागीय कार्यालयात २७ जून सायंकाळी ५:३० वाजेपर्यंत सादर करावयाची आहे.