नागपूरमधील बारावीच्या पेपरफुटी प्रकरणाची SIT मार्फत चौकशी; शिक्षण राज्यमंत्र्यांची माहिती 

एज्युवार्ता न्यूज नेटवर्क

नागपूरमधील सेंट उर्सुला परीक्षा केंद्रावर (Sent Ursula Examination Center Nagpur) झालेल्या बारावी पेपरफुटी प्रकरणी (Class 12th paper leak case) महत्वाची अपडेट समोर आली आहे. या प्रकरणात एसआयटी स्थापन (SIT formed) करण्यात आल्याची माहिती शालेय शिक्षण राज्यमंत्री पंकज भोयर (Pankaj Bhoyar) यांनी दिली आहे. स्थानिक पोलिसांच्या पाच सदस्यांचा या एसआयटी पथकात समावेश असणार आहे. पेपर नेमके फुटले कुठून आणि यामध्ये विभागीय शिक्षण मंडळातील अधिकाऱ्यांची भूमिका काय? परीक्षेपूर्वी किती आणि कोणापर्यंत या प्रश्नपत्रिका पोहोचल्या. इतर जिल्ह्यामध्ये पाठवल्या गेल्या होत्या का? या सर्वांचा सखोल तपास या एसआयटी पथकाद्वारे केला जाणार आहे. 

बारावी पेपर फूटल्याप्रकरणी आतापर्यंत खाजगी कोचिंग क्लास संचालकासह चौघांना पोलिसांनी बेड्या ठोकल्या आहेत. या प्रकरणात शिक्षण विभागातील मोठ्या अधिकाऱ्याचा सहभाग असल्याचा पोलिसांनी संशय आहे. त्या अनुषंगाने पोलीसांना काही धागेदोरे लागले असून त्या दिशेने पोलिसांचा तपासही सुरू आहे. आरोपींमध्ये खासगी क्लास संचालकाचाही समावेश असून मोठं रॅकेट उघड होण्याचा पोलिसांना संशय आहे. 

नागपूरमध्ये बारावीचे दोन पेपर फुटल्याच्या घटनेनंतर फक्त नागपुरातच नाही तर संपूर्ण राज्यात खळबळ उडाली होती. बारावीचे भौतिकशास्त्र आणि रसायनशास्त्राच्या प्रश्नपत्रिका पेपर सुरू होण्याआधीच अर्धातास एका व्हाट्सअप ग्रुपवर आढळून आल्या होत्या. नागपूर पेपरफुटी प्रकरणी आतापर्यंत चौघांना अटक करण्यात आली आहे. खासगी क्लासेस संचालक निशिकांत मून आणि फरहान तसेच जुनेद आणि मुस्तफा हे पोलिसांच्या तावडीत सापडले आहेत. नागपूर पेपरफुटी प्रकरणी मोठे रॅकेट सक्रीय असण्याची शक्यता वर्तवली जात आहे. 

नागपूरच्या सदर परिसरातील सेंट उर्सुला परीक्षा केंद्रावर बारावीच्या केमिस्ट्रीच्या पेपर दरम्यान हे पेपर फुटीचे प्रकरण पर्यवेक्षकाच्या सतर्कतेमुळे उघडकीला आले. सेंट उर्सुला परीक्षा केंद्रावर एक विद्यार्थिनी वारंवार प्रसाधनगृहात जात होती. त्यामुळे केंद्रावरील पर्यवेक्षकाना संशय आला. तिची शिक्षकेच्या माध्यमातून झडती घेण्यात आल्यावर एक स्मार्टफोन जप्त करण्यात आला. तो मोबाईल तपासला असता हा पेपरफुटीचा प्रकार उघडकीला आला आहे. 

XII नावाचा व्हॉट्सअप ग्रुप तयार करण्यात आला होता. पेपरच्या आधी अर्धा तास संबंधीत व्हॉट्सअप ग्रुपवर पेपर आले होते. बारावीचे फिजिक्स आणि केमिस्ट्रीचे पेपर व्हॉट्सअप ग्रुप लिक झाले. या व्हॉट्सअप ग्रुपचे एकूण 21 सदस्य आहेत.  त्यामुळे या व्हॉट्सअप ग्रुप असणाऱ्या सर्व सदस्यांची चौकशी होण्याची शक्यता आहे. आता राज्यमंत्र्यांनी एसआयटी घोषणा केल्यामुळे या प्रकरणाची तपासाची व्याप्ती ही वाढणार आहे. त्यामुळे आता या प्रकरणाच्या मुळाशी जाऊन दोषींवर कारवाई होण्याची शक्यता आहे.