NTA ने JEE मेन परीक्षेसंदर्भात 'ही' महत्त्वाची सूचना केली प्रसिद्ध

एज्युवार्ता न्यूज नेटवर्क

नॅशनल टेस्टिंग एजन्सीने (NTA)  संयुक्त प्रवेश परीक्षा (मुख्य) 2025 (Joint Entrance Examination (Main) 2025) संदर्भात महत्त्वपूर्ण सूचना प्रसिद्ध (Important Notice Released) केली आहे. या माहितीमध्ये नॅशनल टेस्टिंग एजन्सीने जेईई परीक्षेचा फॉर्म भरताना येणाऱ्या तांत्रिक अडचणी सोडवण्यासाठी उपाय दिला आहे. जेईई मेन परीक्षेसाठी अर्ज करताना, काही उमेदवारांना त्यांच्या आधार कार्डावर दिलेले नाव आणि इयत्ता 10वी च्या प्रमाणपत्रावर नोंदवलेले नाव यात तफावत आढळून आली होती, त्यामुळे उमेदवारांना फॉर्म भरण्यात अडचणी येत आहेत. याबाबत विद्यार्थ्यांनी एनटीएला माहिती दिली होती. याची दखल घेत NTA ने हे उपाय दिले आहेत. 

अभियांत्रिकी प्रवेश परीक्षेसाठी अर्ज करणारे उमेदवार https://www.nta.ac.in या अधिकृत वेबसाइटला भेट देऊन संबंधित अधिसूचना पाहू शकतात. उमेदवारांना येणाऱ्या तांत्रिक समस्या टाळण्यासाठी पुढील पायऱ्यांचा आधार  घ्यावा. आधार  प्रमाणीकरण करताना नाव जुळत नसलेला संदेश दिसल्यास, पॉप-अप बंद करण्यासाठी “X” बटणावर क्लिक करा. आता तुमच्या समोर एक नवीन विंडो उघडेल, येथे तुमचे नाव जसे तुमच्या आधार कार्डवर लिहिले आहे तसे लिहा. ही प्रणाली शैक्षणिक प्रमाणपत्रावरून नाव आणि आधार कार्डवरून प्रविष्ट केलेले नाव नोंदवेल. हे तुम्हाला ऑनलाइन अर्ज प्रक्रिया सुरू ठेवण्यास अनुमती देईल.

जेईई मेन 2025 साठी नोंदणी प्रक्रिया सुरू झाली असून परीक्षेसाठी 22 नोव्हेंबर 2024 रोजी रात्री 9 वाजेपर्यंत अर्ज भरण्याची प्रक्रिया सुरू राहील. इच्छुक आणि पात्र उमेदवार अधिकृत वेबसाइट jeemain.nta.nic.in वर जाऊन अर्ज करू शकतात. जेईई मेन 2025 चे पहिले सत्र 22 ते 31 जानेवारी दरम्यान होणार आहे. तर दुसरे सत्र 21 ते 8 एप्रिल दरम्यान होणार आहे. परीक्षेची अर्ज प्रक्रिया संपल्यानंतर दुरुस्ती विंडो उघडली जाईल. या कालावधीत, उमेदवार अर्जात विहित बदल करू शकतात. त्यासाठी शुल्कही जमा करावे लागणार आहे.