NTA पुन्हा वादाच्या भोवऱ्यात NIFT 2026 निकालावरून वाद स्कोअरकार्ड आणि उपस्थिती नोंदींतील विसंगती
याशिवाय उपस्थिती नोंदींबाबतही अनेक धक्कादायक दावे समोर आले आहेत. काही विद्यार्थ्यांना परीक्षा दिल्यानंतरही “अनुपस्थित” दाखवण्यात आल्याचा आरोप आहे, तर काही जणांना परीक्षा न देता देखील गुण मिळाल्याचे सोशल मीडियावरील पोस्टमध्ये नमूद करण्यात आले आहे.
eduvarta@gmail.com 
एज्युवार्ता न्यूज नेटवर्क
नॅशनल इन्स्टिट्यूट ऑफ फॅशन टेक्नॉलॉजी (NIFT) प्रवेश परीक्षा 2026 च्या अंतिम निकालानंतर (final result) नॅशनल टेस्टिंग एजन्सी (NTA) पुन्हा एकदा वादाच्या भोवऱ्यात सापडली आहे. देशभरातील अनेक विद्यार्थ्यांनी निकालातील गुण, (Lack of transparency in the results) उपस्थिती नोंदी आणि बायोमेट्रिक पडताळणी प्रक्रियेत गंभीर त्रुटी असल्याचा आरोप केला आहे. नुकत्याच जाहीर झालेल्या निकालानंतर सोशल मीडियावर विद्यार्थ्यांच्या तक्रारींचा (Students' complaints) पूर आला असून, निकाल प्रक्रियेच्या पारदर्शकतेवर प्रश्नचिन्ह उपस्थित केले जात आहेत.
विद्यार्थ्यांच्या म्हणण्यानुसार, क्रिएटिव्ह अॅबिलिटी टेस्ट (CAT) आणि जनरल अॅबिलिटी टेस्ट (GAT) मधील गुण अपेक्षेपेक्षा खूपच कमी दाखवण्यात आले आहेत. काही विद्यार्थ्यांनी दावा केला की, अधिकृत उत्तरतालिकेच्या आधारे स्वतःचे गुण मोजल्यानंतर त्यांचे संभाव्य गुण स्कोअरकार्डमध्ये दर्शवलेल्या गुणांपेक्षा लक्षणीयरीत्या जास्त होते. CAT या सर्जनशील स्वरूपाच्या परीक्षेसाठी उत्तरतालिका उपलब्ध नसल्याने गुणांकनाची पडताळणी करणेही कठीण होत असल्याचे विद्यार्थ्यांचे म्हणणे आहे.
याशिवाय उपस्थिती नोंदींबाबतही अनेक धक्कादायक दावे समोर आले आहेत. काही विद्यार्थ्यांना परीक्षा दिल्यानंतरही “अनुपस्थित” दाखवण्यात आल्याचा आरोप आहे, तर काही जणांना परीक्षा न देता देखील गुण मिळाल्याचे सोशल मीडियावरील पोस्टमध्ये नमूद करण्यात आले आहे. अनेक केंद्रांवर बायोमेट्रिक पडताळणी व्यवस्थित झाली नसल्याचाही आरोप विद्यार्थ्यांनी केला आहे.
दरम्यान, एनटीएने या आरोपांवर प्रतिक्रिया देताना सांगितले की, सुमारे 12 हजार उमेदवारांपैकी केवळ 15 विद्यार्थ्यांनी अधिकृतपणे निकालासंदर्भात तक्रारी नोंदवल्या होत्या आणि त्या सर्वांचे निराकरण करण्यात आले आहे. मात्र अनेक विद्यार्थी या दाव्याशी सहमत नसून, ई-मेल आणि दूरध्वनीद्वारे वारंवार संपर्क साधूनही समाधानकारक उत्तर मिळाले नसल्याचे सांगत आहेत.
NEET-UG 2026 संदर्भातील वादानंतर आता NIFT निकालाबाबतही प्रश्न उपस्थित झाल्याने एनटीएच्या परीक्षा व्यवस्थापन आणि मूल्यमापन प्रक्रियेवरील विश्वासार्हतेची पुन्हा कसोटी लागली आहे. विद्यार्थ्यांनी निकालांचे पुनर्परीक्षण, पारदर्शक चौकशी आणि आवश्यक असल्यास पुनर्मूल्यांकनाची मागणी केली असून, या प्रकरणाकडे शिक्षण क्षेत्राचे लक्ष लागले आहे.
