NEET UG निर्णयावर आज सर्वोच्च मोहर उमटणार? विद्यार्थ्यांचा जीव टांगणीला..

एज्युवार्ता न्यूज नेटवर्क

नॅशनल एलिजिबिलिटी कम एन्ट्रन्स टेस्ट - अंडरग्रेजुएट (NEET UG) 2024 रद्द करावी आणि नॅशनल टेस्टिंग एजन्सी (NTA) ला ती पुन्हा (re-examination should be conducted) आयोजित करण्याचे आदेश द्यावे. अशी मागणी करणाऱ्या 38 याचिकांवर आज सोमवार 8 जुलै रोजी सर्वोच्च न्यायालयात (Supreme Court) सुनावणी होणार आहे. त्यामुळे आज NEET UG 2024 निर्णयावर सुप्रीम कोर्टाची मोहर उमटणार असून यामुळे देशभरातील तब्बल २३ लाख विद्यार्थ्यांचा जीव टांगणीला लागला आहे.

नीट प्रकरणांची सुनावणी सर्वोच्च न्यायालयाचे सरन्यायाधीश न्यायमूर्ती डी.वाय. चंद्रचूड यांच्या अध्यक्षतेखालील तीन न्यायमूर्तींच्या खंडपीठामार्फत करण्यात येणार आहे.  न्यायाधीश न्यायमूर्ती जे.बी. पारडीवाला आणि न्यायमूर्ती मनोज मिश्रा यांचा यामध्ये समावेश असणार आहे. NTA ने पदवीधर प्रवेश परीक्षा NEET UG 2024 5 मे रोजी आयोजित केली. 4 जून रोजी निकाल जाहीर केल्यानंतर, ग्रेस गुण दिलेल्या 1 हजार 563 उमेदवारांची पुनर्परीक्षा घेण्याचा निर्णय सुर्वोच्च न्यायालयाने दिला. त्यामुळे आता कोर्ट काय निर्णय देणार याकडे सर्व विद्यार्थ्यांचे लक्ष लागले आहे.  

नीट प्रकरणातील काही याचिकांवर मागील महिन्यात १८ जून रोजी सुनावणी झाली. या सुनावणीदरम्यान, सरकारी एजन्सी एनटीएला सर्वोच्च न्यायालयाने आपली बाजू मांडण्याचे निर्देश दिले होते. तसेच या प्रकरणांची पुढील सुनावणी ८ जुलै रोजी घेण्याचा निर्णय खंडपीठाने घेतला आहे. मात्र, 18 जून रोजी झालेल्या सुनावणीनंतर, सुप्रीम कोर्टात आणखी अनेक याचिका दाखल करण्यात आल्या. ज्यामध्ये परीक्षेत गैरप्रकार झाला असल्यामुळे सर्व परीक्षा रद्द करून पुनर्परीक्षा घेण्यात यावी, अशा मागणीच्या याचिकांचा समावेश आहे. ज्याची सुनावणी आज होणार आहे. त्यामुळे देशभरातील २३ लाख विद्यार्थ्यांचे लक्ष या निर्णयाकडे लागले आहे.