मनपा निवडणुकीचा नागपूर विद्यापीठाला फटका, १४ ते १६ जानेवारीचे पेपर पुढे ढकलले 

एज्युवार्ता न्यूज नेटवर्क 

नुकत्याच जाहीर झालेल्या महानगरपालिका निवडणुकीचा (Municipal elections announced) फटका सर्वात आधी राष्ट्रसंत तुकडोजी महाराज नागपूर विद्यापीठाच्या (Rashtrasant Tukadoji Maharaj Nagpur University) हिवाळी परीक्षेला बसला आहे. १५ जानेवारी रोजी नागपूर महापालिकेचे मतदान आहे तर १६ जानेवारीला मतमोजणी होणार आहे. त्या पार्श्वभूमीवर नागपूर विद्यापीठाने आपल्या परीक्षेचे १४ ते १६ जानेवारी दरम्यान (Papers from January 14 to 16 postponed) असलेले सर्व पेपर पुढे ढकलण्याचा निर्णय घेतला आहे. एका बाजूला विद्यापीठाच्या परीक्षा आधीच सुमारे दोन महिने उशिरा होत असताना, आता आणखी ३ ते ४ दिवसांचा विलंबही विद्यार्थ्यांसाठी अडचणीचा ठरताना दिसत आहे. 

हेही वाचा - पीएच. डी. शिष्यवृत्ती धारक विद्यार्थ्यांचा सरकारच्या 'त्या' निर्णयाला कडाडून विरोध

यंदा विद्यापीठाकडून हिवाळी सत्राच्या परीक्षा उशिरा घेण्यात येत आहेत. स्थानिक स्वराज्य संस्थांच्या निवडणुका होणार, याची आधीच शक्यता होती. मात्र, त्या जानेवारीतच होतील की नाही, हे निश्चित नव्हते. जानेवारीत न झाल्यास त्या एप्रिल-मे महिन्यात होणे अपेक्षित होते. मनपा निवडणुकांच्या तारखा जाहीर होताच विद्यापीठ प्रशासनाने परीक्षांच्या तारखांमध्ये बदल करण्याची तयारी सुरू केली आहे. विद्यार्थ्यांच्या सोयीसाठी तसेच निवडणूक कामकाजासाठी मोठ्या प्रमाणावर अध्यापन व अशैक्षणिक कर्मचाऱ्यांची नियुक्ती करावी लागणार असल्याने हे वेळापत्रक बदलण्यात येत आहे. यापूर्वीच विद्यार्थ्यांनी १४ जानेवारी रोजी परीक्षा घेण्यास आक्षेप नोंदवला होता. कारण त्या दिवशी मकर संक्रांत साजरी केली जाते. 

मनपा निवडणुका शाळा व महाविद्यालयांमध्ये घेतल्या जातात आणि त्यासाठी मोठ्या प्रमाणावर मनुष्यबळाची आवश्यकता असते. यात विद्यापीठासह अनुदानित महाविद्यालयांतील कर्मचारी व अधिकाऱ्यांची निवडणूक ड्यूटी लागणार आहे. १५ जानेवारी रोजी मतदान होणार असून १४ जानेवारीपासून केंद्रांवर कर्मचारी हजर राहतील आणि १६ जानेवारीपर्यंत ते निवडणूक कामकाजात गुंतलेले राहतील. त्यामुळे या तीन दिवसांतील परीक्षांच्या तारखा पुढे ढकलण्यात आल्या आहेत.