मुंबई विद्यापीठ : आता LLM CET परीक्षा 'या' तारखेला होणार,  बार कौन्सिल आणि LLM परीक्षा एकाच दिवशी आल्याने बदल

एज्युवार्ता न्यूज नेटवर्क 

मुंबई विद्यापीठाने (Mumbai University) शैक्षणिक वर्ष २०२६-२७  साठी घेण्यात येणाऱ्या (Academic year 2026-27)  एलएलएम (LL.M.) प्रवेशासाठी घेण्यात येणाऱ्या कॉमन एंट्रन्स टेस्ट ची (CET) तारीख बदलून १२ जून २०२६ अशी निश्चित (June 12 date fixed) केली आहे. ही परीक्षा सेंटर-बेस्ड ऑनलाइन पद्धतीने दोन सत्रांमध्ये घेण्यात येणार आहे. दुपारी २ ते ३ आणि सायंकाळी ५ ते ६ या वेळेत विद्यार्थ्यांना परीक्षा देण्याची संधी मिळणार आहे. परीक्षेचे प्रवेशपत्र परीक्षेपूर्वी एक आठवडा आधी विद्यार्थ्यांच्या लॉगिन आयडीमध्ये उपलब्ध होईल, अशी माहिती विद्यापीठाने दिली आहे.

मूळ वेळापत्रकानुसार ही परीक्षा ७ जून २०२६ रोजी दुपारी २ ते ३ वाजेदरम्यान घेण्यात येणार होती. मात्र, त्याच दिवशी बार कौन्सिल ऑफ इंडियामार्फत अखिल भारतीय बार परीक्षा २१ (AIBE XXI) घेण्यात येणार असल्याचे जाहीर झाल्याने विद्यार्थ्यांमध्ये चिंतेचे वातावरण पसरले होते. वकीली व्यवसायासाठी अत्यंत महत्त्वाची असलेली बार परीक्षा आणि एलएलएम सीईटी एकाच दिवशी येत असल्याने विद्यार्थ्यांना दोन परीक्षांपैकी एका परीक्षेला मुकावे लागणार होते. त्यामुळे मुंबई विद्यापीठ आणि संलग्न महाविद्यापीठातील विधी पदवीधर विद्यार्थ्यांच्या शैक्षणिक भविष्यावर परिणाम होण्याची भीती व्यक्त करण्यात आली होती.

विद्यार्थ्यांच्या संघटनांनी आणि इच्छुक उमेदवारांनी विद्यापीठाकडे एलएलएम सीईटी पुढे ढकलण्याची मागणी केली होती. विद्यार्थ्यांचे शैक्षणिक हित लक्षात घेऊन मुंबई विद्यापीठाने विद्यार्थ्यांची मागणी तातडीने स्वीकारली आणि परीक्षा पुढे ढकलण्याचा निर्णय घेतला. “विद्यार्थ्यांचे कोणत्याही प्रकारचे शैक्षणिक नुकसान होऊ नये, यासाठी हा निर्णय घेण्यात आला आहे,” अशी माहिती विद्यापीठाकडून देण्यात आली आहे. परीक्षेच्या नवीन तारखेची माहिती विद्यापीठाचे अधिकृत संंकेतस्थळ www.mu.ac.in वर ‘Online LL.M. CET Exam – २०२६-२७’ या सेक्शनमध्ये उपलब्ध करून देण्यात आली आहे.

या निर्णयामुळे संबंधित क्षेत्रातील विद्यार्थ्यांमध्ये समाधान व्यक्त करण्यात येत आहे. एलएलएम ही दोन वर्षांची पदव्युत्तर पदवी असून, मुंबई विद्यापीठ आणि त्याच्या संलग्नित विधी महाविद्यालयांमध्ये प्रवेशासाठी ही सीईटी अनिवार्य आहे. परीक्षा केंद्र-आधारित ऑनलाइन पद्धतीने घेतली जाणार असल्याने विद्यार्थ्यांनी वेळापत्रक आणि सूचना नियमितपणे तपासाव्यात, असे विद्यापीठाने आवाहन करण्यात आले आहे. या बदलामुळे विद्यार्थ्यांना दोन्ही महत्त्वाच्या परीक्षा देण्याची संधी मिळणार असल्याने शैक्षणिक क्षेत्रात सकारात्मक प्रतिसाद मिळत आहे.