NTA चा विद्यार्थ्यांना मोठा दिलासा, NEET शुल्क परताव्याच्या बँक तपशीलासाठी 'या' तारखेपर्यंत मुदतवाढ
२२ मे पासून सुरू झालेल्या या सुविधेद्वारे आतापर्यंत सुमारे १३ लाख उमेदवारांनी आपले बँक तपशील अपडेट केले आहेत. तरी अजून हजारो उमेदवार प्रक्रिया पूर्ण करू शकलेले नाहीत. त्यांच्या सोयीसाठी एनटीएने ही मुदतवाढ जाहीर केली आहे.
eduvarta@gmail.com 
एज्युवार्ता न्यूज नेटवर्क
नॅशनल टेस्टिंग एजन्सीने (NTA) नीट-युजी २०२६ (NEET UG 2026 ) परीक्षेच्या शुल्क परताव्याच्या प्रक्रियेत (Fee Refund Process) उमेदवारांना मोठा दिलासा दिला आहे. बँक खात्याचे तपशील अद्याप सादर न केलेल्या उमेदवारांसाठी अंतिम मुदत वाढवून २२ जून २०२६ (Deadline extended to June 22) करण्यात आली आहे. यापूर्वी देण्यात आलेली ही मुदत २७ मे २०२६ रोजी संपुष्ठात आली. मात्र, अनेक उमेदवार बँक तपशील भरण्यापासून वंचित राहिले होते. त्यानतंर हा मुदतवाढीचा निर्णय घेण्यात आला आहे.
एनटीएने जारी केलेल्या सार्वजनिक सूचनेनुसार, परीक्षा रद्द झाल्यामुळे शुल्क परतावा प्रक्रिया सुरू करण्यात आली होती. २२ मे पासून सुरू झालेल्या या सुविधेद्वारे आतापर्यंत सुमारे १३ लाख उमेदवारांनी आपले बँक तपशील अपडेट केले आहेत. तरी अजून हजारो उमेदवार प्रक्रिया पूर्ण करू शकलेले नाहीत. त्यांच्या सोयीसाठी एनटीएने ही मुदतवाढ जाहीर केली आहे.
उमेदवारांना neet.nta.nic.in या अधिकृत वेबसाइटवर लॉगिन करून बँक खाते क्रमांक, IFSC कोड, बँक नाव आणि खातेदाराचे नाव अचूक भरावे लागेल. एकदा तपशील सबमिट केल्यानंतर बदल करता येणार नाहीत, त्यामुळे माहिती भरण्यापूर्वी दोनदा तपासणी करा. रद्द झालेल्या चेकची स्कॅन कॉपी अपलोड करण्याची सुविधाही उपलब्ध आहे. परतावा थेट उमेदवारांच्या बँक खात्यात जमा होईल.
एनटीएने स्पष्ट केले की, ही मुदतवाढ केवळ बाकी असलेल्या उमेदवारांसाठी आहे. प्रक्रिया पूर्ण झालेल्या उमेदवारांना पुन्हा बदल करण्याची गरज नाही. शुल्क परतावा प्रक्रिया पूर्ण झाल्यानंतर उमेदवारांना SMS किंवा ईमेलद्वारे सूचना दिली जाईल. NEET UG २०२६ परीक्षा रद्द झाल्यामुळे लाखो विद्यार्थ्यांमध्ये नाराजी होती. त्यामुळे काही एनटीएने शुल्क परतावा प्रक्रिया वेगाने राबवण्याचे आश्वासन दिले होते. या मुदतवाढीमुळे विद्यार्थ्यांना पुरेसा वेळ मिळाला असून, ते आरामात तपशील अपडेट करू शकतील.
