आंदोलनाचे नेहमीच स्वागत, पण शिवीगाळ, ध्वजाचे नुकसान नको; कुलगुरू डॉ. विजय फुलारी
विद्यापीठात नियमानुसार होणाऱ्या आंदोलनाचे नेहमीच स्वागत केले आहे. त्यातून समस्याही सोडविण्याचा प्रयत्न होत आहे. मात्र, चुकीच्या पद्धतीने आंदोलने करणे, कुलगुरूंच्या गाडीचा ध्वज तोडणे, शिवीगाळ करणारी आंदोलने निषेधार्ह आहेत.
eduvarta@gmail.com 
एज्युवार्ता न्यूज नेटवर्क
छत्रपती संभाजीनगर येथील डॉ. बाबासाहेब आंबेडकर मराठवाडा विद्यापीठाच्या (Dr. Babasaheb Ambedkar Marathwada University) व्यवस्थापन परिषदेची बैठक (Management Council Meeting) नुकतीच पार पडली. यावेळी ध्वजाचे नुकसान, शिवीगाळ आदी विषयांवर वादळी चर्चा झाली. विद्यापीठात नियमानुसार होणाऱ्या आंदोलनाचे नेहमीच स्वागत केले आहे. त्यातून समस्याही सोडविण्याचा प्रयत्न होत आहे. मात्र, चुकीच्या पद्धतीने आंदोलने करणे, कुलगुरूंच्या गाडीचा ध्वज तोडणे, शिवीगाळ करणारी आंदोलने निषेधार्ह आहेत. विद्यापीठात चुकीच्या पद्धतीने आंदोलने घडवून आणणाऱ्या कायदेशीर कारवाई केली जाणार असल्याची माहिती कुलगुरू डॉ. विजय फुलारी (Vice Chancellor Dr. Vijay Phulari) यांनी बैठकीत दिली.
यावेळी नॅक मूल्यांकनासंदर्भात माहिती प्रशासनातर्फे सदस्यांना देण्यात आली. बैठकीत नऊ विषयांना मंजुरी देण्यात आली. ठरावावर चर्चा झाल्यानंतर डॉ. योगिता होके पाटील यांनी विद्यापीठात विद्यार्थ्यांना आंदोलने करण्याची गरजच पडू नये, त्यांच्या समस्या तत्काळ सुटल्या पाहिजेत, अशी मागणी केली. नियमानुसार होणाऱ्या आंदोलनांना परवानगी देण्याचा विषय त्यांनी उपस्थितीत केला. या विषयावर वादळी चर्चा झाली. या चर्चेत डॉ. अपर्णा पाटील यांच्यासह अन्य सदस्यांनी सहभाग नोंदविला.
यावर कुलगुरू डॉ. विजय फुलारी यांनी आक्रमक भूमिका घेतली. विद्यार्थ्यांनी आंदोलनापूर्वी मागण्याचे निवेदन प्रशासनाला दिले पाहिजे. मागण्यांवर प्रशासनासोबत चर्चा झाली पाहिजे. चर्चेनंतरही मागण्या न सुटल्यास आंदोलने करावीत. मात्र, कोणतीही माहिती ना देता आंदोलने करून गाड्या, विद्यापीठ ध्वजाचे नुकसान सहन केले जाणार नाही. त्यांच्यावर नियमानुसार कारवाई होईल. काही आंदोलनांमध्ये कुलगुरूंच्या नावाने दिलेल्या शिव्याची माहितीही कुलगुरू डॉ. फुलारी यांनी बैठकीत दिली. यावेळी सर्व सदस्यांनी या कृतीचा निषेध नोंदवला.
विद्यापीठ निधीतून १३ परीक्षा सहायकांची वेतनश्रेणीवर नियुक्त्ती केलेली आहे. या सहायकांना शासनमान्य पदावर सामावून घेण्यासाठी विद्यापीठातील कनिष्ठ सहायक, डाटा एन्ट्री ऑपरेटरच्या मंजूर पदापैकी ५३ पदे रिक्त आहेत. या रिक्त पदांवर परीक्षा सहायकांना कनिष्ठ सहायक किंवा डाटा एन्ट्री ऑपरेटर हे पदनाम देऊन शासनाच्या मंजुरीसाठी प्रस्ताव पाठविण्यास बैठकीत मंजुरी देण्यात आली.
