MPSC Mains Exam 2023 : विद्यार्थ्यांच्या 'त्या' प्रश्नावर, आयोगाकडून स्पष्टीकरण

एज्युवार्ता न्यूज नेटवर्क

महाराष्ट्र लोकसेवा आयोग (MPSC) राज्य सेवा मुख्य परीक्षा 2023 ला (MPSC State Services Mains Exam 2023) तब्बल सहा महिने उलटून गेले तरी अद्याप अंतिम निकाल जाहीर झाला नाही. जे जे ग्रुप ऑफ हॉस्पिटल्सकडून (JJ Group of Hospitals) उमेदवारांचे वैद्यकीय तपासणी अहवाल (Medical examination report of candidates) न मिळाल्याने या परीक्षेच्या निकालाला विलंब होत असल्याचे कारण आयोगाकडून पुढे करण्यात करण्यात आले आहे . तसेच विद्यार्थ्यांच्या मनात असलेल्या विविध प्रश्नांवर आयोगाकडून स्पष्टीकरण देण्यात आले आहे.

राज्य सेवा मुख्य परीक्षेत पात्र ठरणार्‍या उमेदवारांची वैद्यकीय तपासणी महाराष्ट्र लोकसेवा आयोगाकडून मुलाखतीच्या टप्प्यावर  करण्याचे आदेश आहेत. त्यानुसार सर्वसाधारण गुणवत्ता यादीतील उमेदवारांची वैद्यकीय चाचणी करण्यात आलेली असून वैद्यकीय मंडळाने संबंधित उमेदवारांच्या तपासणीनंतर दिलेल्या वैद्यकीय अहवाल / प्रमाणपत्रांच्या प्रती उमेदवारांच्या प्रोफाईलमध्ये आयोगातर्फे पाठविण्यात आल्या आहेत. तसेच सदर अहवालाविरुद्ध आक्षेप असणार्‍या उमेदवारांना अपील करण्याची मुभा देखील देण्यात आली होती. 

त्यानुसार अपील केलेल्या उमेदवारांनी संबंधित वैद्यकीय मंडळासमोर विहित तारखेस पुनःश्च उपस्थित राहणे अभिप्रेत होते. जे उमेदवार अपीलानुसार पुनःश्च वैद्यकीय चाचणीस उपस्थित होते त्यांच्यापैकी काही उमेदवारांचे वैद्यकीय अहवाल वैद्यकीय मंडळाकडून अद्याप प्राप्त झालेले नाहीत.  याबाबत संबंधित अपीलीय वैद्यकीय मंडळाकडे सातत्याने पाठपुरावा सुरू आहे. सदर वैद्यकीय अहवाल प्राप्त करून घेऊन पद पसंतीक्रम मागविण्याची कार्यवाही करण्यात येईल, असे आयोगाकडून प्रसिद्धीपत्रकाद्वारे जाहीर करण्यात आले आहे.

महाराष्ट्र अन्न व औषध प्रशासकीय सेवा मुख्य परीक्षा-२०२३ च्या परीक्षेच्या अनुषंगाने विद्यार्थ्यांमध्ये कोणताही संभ्रम निर्माण होऊ नये, याकरिता हे स्पष्टीकरण देण्यात आले आहे. सदर पध्दत आयोगामध्ये पूर्वीपासूनच अवलंबिण्यात येत असून ती नव्याने अनुसरण्यात आलेली नाही. आयोगाच्या कार्यालयातील अंतर्गत टिप्पणी समाजमाध्यमावर प्रसारीत झालेल्या मुद्यांबाबत यथोचित कारवाई आयोगामार्फत करण्यात येत असल्याचे म्हटले आहे.