CET Cell : एमसीए प्रवेश नोंदणीस मुदतवाढ, 'या' तारखेपर्यंत करता येणार अर्ज; नवे वेळापत्रक जाहीर
राज्य सामाईक प्रवेश परीक्षा कक्ष (सीईटी कक्ष) ने मास्टर ऑफ कॉम्प्युटर अॅप्लिकेशन (एमसीए) अभ्यासक्रमाच्या केंद्रीभूत प्रवेश प्रक्रियेसाठी नोंदणी मुदतवाढ जाहीर केली आहे. विद्यार्थ्यांकडून अल्प प्रतिसाद मिळाल्याने ही मुदतवाढ देण्यात आली आहे.
Eduvarta
एज्युवार्ता न्यूज नेटवर्क
राज्य सामाईक प्रवेश परीक्षा कक्षाने (State Common Entrance Test) मास्टर ऑफ कॉम्प्युटर अॅप्लिकेशन (एमसीए) अभ्यासक्रमाच्या केंद्रीभूत प्रवेश प्रक्रियेसाठी (MCA Course Admission Process) नोंदणी मुदतवाढ जाहीर केली आहे. विद्यार्थ्यांकडून अल्प प्रतिसाद मिळाल्याने ही मुदतवाढ देण्यात आली आहे. आता इच्छुक विद्यार्थी १७ जुलै रोजी सायंकाळी ५ वाजेपर्यंत ऑनलाइन नोंदणी (Registration extended till July 17) आणि आवश्यक कागदपत्रे अपलोड करू शकतील. सीईटी कक्षाने पुढील प्रवेश प्रक्रियेचे संपूर्ण वेळापत्रक जाहीर (New schedule announced) केले आहे.
४ जुलै ते १४ जुलै या कालावधीत एमसीए अभ्यासक्रमासाठी केवळ २८ हजार ८३५ विद्यार्थ्यांनी नोंदणी केली होती. मात्र, प्रवेश परीक्षा दिलेल्या ५३ हजार २५६ विद्यार्थ्यांपैकी प्रवेश प्रक्रियेत सहभागी होणाऱ्यांची संख्या कमी राहिल्याने सीईटी कक्षाने हा निर्णय घेतला. या मुदतवाढीमुळे अधिक विद्यार्थ्यांना एमसीए सारख्या प्रतिष्ठित अभ्यासक्रमात प्रवेश घेण्याची संधी उपलब्ध झाली आहे.
सीईटी कक्षाने प्रसिद्ध केलेल्या वेळापत्रकानुसार, १७ जुलै रोजी सायंकाळी ५ वाजेपर्यंत ऑनलाइन नोंदणी करता येणार आहे. तसेच १८ जुलै रोजी सायंकाळी ५ वाजेपर्यंत अर्जाची ई-पडताळणी किंवा प्रत्यक्ष छाननी व अर्ज निश्चिती पूर्ण करावी लागणार आहे. २१ जुलै रोजी तात्पुरती गुणवत्ता यादी प्रसिद्ध होईल. या यादीवर आक्षेप नोंदविण्यासाठी २२ ते २४ जुलैपर्यंत मुदत देण्यात आली आहे. अंतिम गुणवत्ता यादी २७ जुलै रोजी संकेतस्थळावर जाहीर करण्यात येणार आहे.
विद्यार्थ्यांसाठी कागदपत्र पडताळणीचे दोन पर्याय उपलब्ध आहेत. ‘ई-पडताळणी’ पर्याय निवडल्यास संपूर्ण प्रक्रिया ऑनलाइन होईल आणि विद्यार्थ्याला प्रत्यक्ष उपस्थित राहण्याची गरज नाही. तर ‘प्रत्यक्ष पडताळणी’ पर्याय निवडल्यास जवळच्या केंद्रावर जाऊन कागदपत्रे तपासून घ्यावी लागतील. विद्यार्थ्यांनी अर्ज भरताना कोणतीही एक पद्धत निवडणे अनिवार्य आहे.
सीईटी कक्षाने विद्यार्थ्यांना आवाहन केले आहे की, त्यांनी संकेतस्थळावर नियमित भेट देऊन सर्व अपडेट्स तपासाव्यात. मुदतवाढीचा लाभ घेत उर्वरित विद्यार्थ्यांनी तात्काळ नोंदणी पूर्ण करावी. एमसीए अभ्यासक्रमात प्रवेश घेऊन आयटी क्षेत्रात करिअर घडवण्याची ही चांगली संधी आहे. अधिक माहितीसाठी अधिकृत वेबसाइटला भेट द्या.
