रडणाऱ्या मुलीला चारचाकीत घालून अज्ञात विद्यापीठातून फरार; दोन साथीदार पकडले
सुरक्षा कर्मचारी गाडी जवळ येत असल्याचे पाहून रडत असलेल्या मुलीला घेऊन एक अज्ञात व्यक्ती गाडी घेऊन तेथून पसार झाला. मात्र, त्याच्याबरोबर असणारे दोन तरुण हे पाहून पळत सुटले. संबंधित तरुणांचा पाठलाग करून त्यांना पकडण्यात आले आहे.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठातील (Savitribai Phule Pune University)मुलींच्या वसतिगृहाजवळील चौकात जवळून एका मुलीला (one girl)अज्ञात व्यक्ती चारचाकी गाडीत घालून पसार झाला. मात्र, यावेळी त्याच्याबरोबर असणाऱ्या दोन साथीदारांना पकडण्यात यश आले असून संबंधितांना पोलिसांच्या ताब्यात देण्यात आले आहे.शुक्रवारी रात्री साडेआठ वाजण्याच्या सुमारास चित्रपटातील एखाद्या थरारक सीन प्रमाणे ही धक्कादायक घटना घडली. त्यामुळे विद्यापीठात एकच खळबळ उडाली असून सर्वत्र याच घटनेची चर्चा सुरू आहे. संबंधित विद्यार्थिनीचे अपहरण (kidnapping of student) तर केले नाही ना अशी भीती व्यक्त केले जात आहे.
सावित्रीबाई फुले पुणे विद्यापीठ गेल्या काही दिवसांपासून अनेक चित्र विचित्र घटनांमुळे चर्चेत आले आहे. विद्यापीठातील मुलींच्या वसतिगृहात दारूच्या बाटल्या सापडल्याची घटना नुकतीच समोर आली होती. त्याचप्रमाणे मुलींची छेडछाड केल्याच्या घटनाही सातत्याने घडत आहेत. त्यात आता एका मुलीला अज्ञात व्यक्ती चारचाकी गाडीत घालून पसार झाल्याचे समोर आले आहे. त्यामुळे विद्यापीठाच्या सुरक्षिततेचा प्रश्न ऐरणीवर आला आहे.
विद्यापीठाच्या मराठी विभागाजवळील चौकात एक चार चाकी गाडी उभी होती. या गाडीत एक मुलगी रडत होती. हे पाहून विद्यापीठातील काही विद्यार्थ्यांनी जवळच असलेल्या विद्यापीठाच्या सुरक्षा कर्मचाऱ्यांना याबाबतची माहिती दिली. सुरक्षा कर्मचारी गाडी जवळ येत असल्याचे पाहून रडत असलेल्या मुलीला घेऊन एक अज्ञात व्यक्ती गाडी घेऊन तेथून पसार झाला. मात्र, त्याच्याबरोबर असणारे दोन तरुण हे पाहून पळत सुटले. संबंधित तरुणांचा पाठलाग करून त्यांना पकडण्यात आले आहे. तसेच या तरुणांना पोलिसांच्या ताब्यात देण्यात आले. चतु:शृंगी पोलीस या घटनेचा तपास करत असून अज्ञात व्यक्तीचा शोध सुरू आहे. तसेच सीसीटीव्ही तपासून गाडीचा क्रमांक शोधण्याचा प्रयत्न सुरू आहे.
पाठलाग करून पकडलेले दोन तरुण सांगवी व औंध परिसरातील असून त्यातील एका तरुणाची बॅग व मोबाईल अज्ञात व्यक्तीने घेऊन गेलेल्या चार चाकी गाडीत गेला आहे. या तरुणांनी अद्याप कोणतीही माहिती दिलेली नाही. तसेच गाडीत रडत असलेली मुलगी विद्यापीठातील विद्यार्थिनी आहे किंवा नाही, याबाबतही अद्याप अधिकृत माहिती समोर आलेली नाही. रात्री उशिरापर्यंत या घटनेचा तपास सुरू होता, असे विद्यापीठातील विश्वसनीय सूत्रांनी सांगितले.
