गणित शिक्षणात नवकल्पना – “जोडो ज्ञान” उपक्रमामुळे विद्यार्थ्यांची प्रगती

एज्युवार्ता न्यूज नेटवर्क 

PM Shri Kendriya Vidyalaya No. 2 AFS Pune येथे गणित विषय अधिक परिणामकारक, रंजक आणि समज-आधारित करण्यासाठी “जोडो ज्ञान” ही अभिनव पद्धत यशस्वीपणे राबविण्यात येत आहे. ही संशोधनाधारित अध्यापन पद्धती असून विद्यार्थ्यांना कृती-आधारित, अनुभवात्मक आणि खेळाच्या माध्यमातून शिकण्याची संधी उपलब्ध करून देते.या पद्धतीअंतर्गत विद्यार्थी केवळ पाठांतरावर अवलंबून न राहता स्वतः शोध, प्रयोग आणि सहभागातून गणितीय संकल्पना आत्मसात करत आहेत. विविध कृती आणि हँड्स-ऑन शिक्षणाच्या माध्यमातून विद्यार्थी स्वतःची समज विकसित करत असून त्यांच्या तर्कशक्ती आणि गणितीय आकलनात लक्षणीय सुधारणा दिसून येत आहे.

“जोडो ज्ञान” उपक्रमांतर्गत संख्या बोध, भिन्न, दशांश, पूर्णांक यांसारख्या मूलभूत संकल्पना सोप्या आणि प्रभावी पद्धतीने शिकविण्यासाठी विशेष शैक्षणिक साहित्य आणि उपक्रमांचा वापर केला जात आहे. विशेषतः प्राथमिक स्तरावर संख्या बोध विकसित करण्यावर भर देण्यात येत आहे, ज्यामुळे पुढील गणित शिक्षणासाठी भक्कम पाया तयार होत आहे.

शाळेमार्फत National Education Policy 2020 च्या उद्दिष्टांची पूर्तता करण्यासाठी विशेष प्रयत्न केले जात असून, विद्यार्थ्यांची मूलभूत संख्यात्मक क्षमता विकसित करण्यासाठी वर्ग अधिक सक्रिय, सहभागात्मक आणि कृती-आधारित बनविण्यात आले आहेत.या उपक्रमाच्या यशस्वी अंमलबजावणीसाठी सौ. नीलम यादव यांनी प्राथमिक व पूर्व-प्राथमिक स्तरावरील सर्व शिक्षकांना प्रशिक्षण दिले आहे. या प्रशिक्षणाचा सकारात्मक परिणाम वर्गांमध्ये स्पष्टपणे दिसून येत असून, अध्यापन साहित्याचा प्रभावी वापर आणि विद्यार्थ्यांच्या शैक्षणिक गुणवत्तेत सुधारणा झालेली आहे.

शाळेचे प्राचार्य श्री भरत भूषण यांनी शिक्षकांच्या कार्याचे कौतुक करत त्यांच्या प्रयत्नांना दाद दिली. तसेच, मुख्याध्यापक श्री संजय कुमार पाटील यांनी सांगितले की, “जोडो ज्ञान पद्धतीमुळे राष्ट्रीय शिक्षण धोरणानुसार विद्यार्थ्यांची संख्यात्मक क्षमता प्रभावीपणे विकसित होत असून गणित विषयाविषयी त्यांची आवड आणि समज दोन्ही वाढत आहेत. ”एकूणच, “जोडो ज्ञान” उपक्रमामुळे शाळेतील गणित शिक्षणाला नवी दिशा मिळत असून विद्यार्थ्यांना आत्मविश्वासी, तर्कशुद्ध आणि सक्षम बनविण्यात हा उपक्रम महत्त्वाची भूमिका बजावत आहे.