दुबईत सिंबायोसिसच्या पहिल्या आंतरराष्ट्रीय कॅम्पसचे उद्घाटन

एज्युवार्ता न्यूज नेटवर्क 

सिंबायोसिस आंतरराष्ट्रीय विद्यापीठाच्या (SIU) दुबई येथील पहिल्या आंतरराष्ट्रीय कॅम्पसचे  उद्घाटन दुबईतील हिल्टन हॉटेलमध्ये करण्यात आले.भारत-यूएई संबंधांमधील मैलाचा दगड असलेल्या या समारंभात UAE चे Minister of Tolerance and Coexistence शेख नाह्यान मुबारक अल नाह्यान  व भारत सरकारचे माननीय परराष्ट्र व्यवहार मंत्री डॉ. एस. जयशंकर यावेळी प्रमुख अतिथी म्हणून उपस्थित होते.

सिंबायोसिस आंतरराष्ट्रीय विद्यापीठाचे संस्थापक व अध्यक्ष तसेच सिंबायोसिसचे कुलपती डॉ. शां. ब. मुजुमदार हे या कार्यक्रमाच्या अध्यक्षस्थानी उपस्थित होते. तसेच सिंबायोसिसच्या प्र- कुलपती व प्रधान संचालिका डॉ. विद्या येरवडेकर, सिंबायोसिसचे कुलगुरू डॉ. रामकृष्णन रमण आदी या समारंभासाठी उपस्थित होते.  UAE-आधारित कॉन्सुल जनरल, प्रमुख उद्योगपती, आघाडीची मीडिया व्यक्तिमत्त्वे आणि UAE मध्ये उच्चस्तरावर काम करणारे १ हजार पेक्षा अधिक सिंबायोसिसचे माजी विद्यार्थी उपस्थित होते.

महामहिम शेख नाह्यान मुबारक अल नाह्यान यांनी दुबईमध्ये सिंबायोसिस विद्यापीठाची शाखा उघडणे ही UAE आणि भारत यांच्यातील सहकार्याच्या प्रवासातील एक महत्त्वपूर्ण घटना असल्याचे सांगितले. सिंबायोसिसच्या दुबई मधील विस्तारामुळे जागतिक बाजारपेठेतील गरजा पूर्ण करणारे प्रगत कार्यक्रम विद्यार्थ्यांना शिकण्यासाठी उपलब्ध झाले आहेत. याचा UAE मधील उच्च शिक्षण क्षेत्रावर नक्कीच सकारात्मक परिणाम पाहायला मिळेल, असे देखील ते म्हणाले.

डॉ. एस. जयशंकर म्हणाले, सिंबायोसिस आंतरराष्ट्रीय विद्यापीठाचा दुबई कॅम्पस ही केवळ सिंबायोसिससाठीच नव्हे तर संपूर्ण भारतीय उच्च शिक्षणासाठी अभिमानास्पद कामगिरी आहे. हा मैलाचा दगड जागतिक प्रतिभेला चालना देण्याच्या भारताच्या वचनबद्धतेचा पुरावा आहे. भारत-यूएई शैक्षणिक आणि सांस्कृतिक संबंध अधिक दृढ करण्यासाठी उचललेले एक महत्वपूर्ण पाऊल आहे. सिंबायोसिसने कायमच  ज्ञानाची देवाणघेवाण आणि सांस्कृतिक संबंधांची मूल्ये मूर्त स्वरूपात आणली आहेत. ज्यामुळे हे कॅम्पस आंतरराष्ट्रीय उच्च शिक्षणातील प्रगतीचे दीपस्तंभ बनले आहे.

सिंबायोसिस विद्यापीठाचा दुबई कॅम्पस हा सप्टेंबरमध्ये १०० पेक्षा अधिक विद्यार्थ्यांसह सुरू करण्यात आलेला आहे. UAE च्या  शैक्षणिक मान्यता आयोग (CAA), ज्ञान आणि मानव विकास प्राधिकरण (KHDA), आणि शिक्षण मंत्रालय (MOE) यांच्याकडून संपूर्ण मान्यता आणि परवाना घेऊन कामकाज सुरू करणारे दुबईतील सिंबायोसिस हे पहिले भारतीय विद्यापीठ आहे. सिंबायोसिसचा हा कॅम्पस दुबईच्या D33 अजेंडा, तसेच दुबईच्या नवीन एज्युकेशन 33 रणनीतीशी संरेखित आहे. विद्यार्थ्यांना जागतिक स्तरावर जागतिक दर्जाचे मान्यताप्राप्त शिक्षण देऊन भविष्यासाठी कुशल कर्मचारी तयार करण्याच्या कामात योगदान देणार आहे. 

या कॅम्पसमध्ये अकाऊंटिंग आणि फायनान्समधील बॅचलर ऑफ बिझनेस ॲडमिनिस्ट्रेशन (बीबीए), मास्टर ऑफ बिझनेस ॲडमिनिस्ट्रेशन (एमबीए), एआय आणि डेटा सायन्समधील स्पेशलायझेशनसह बॅचलर ऑफ कॉम्प्युटर ॲप्लिकेशन्स (बीसीए), तसेच मीडिया व बॅचलर ऑफ आर्ट्स इत्यादी कोर्सेस सुरु करण्यात आले आहेत.