नव्या वर्षात शिक्षण विभागाला मिळाले नवे शिक्षण आयुक्त 

एज्युवार्ता न्यूज नेटवर्क 

शालेय शिक्षण विभागाला नव्या वर्षात नवे शिक्षण आयुक्त (new education commissioner) मिळाले असून राज्याचे दिव्यांग कल्याण विभागाचे सचिव सचिंद्र प्रताप सिंह (sachindra Prasad Singh)यांच्याकडे राज्याच्या शिक्षण आयुक्त पदाची जबाबदारी देण्यात आली आहे. तर शिक्षण आयुक्त पदाचा अतिरिक्त कार्यभार पाहणारे आणि सध्या क्रीडा व युवक सेवा विभागाचे आयुक्त सुरज मांढरे (Suraj mandare) यांची बदली कृषी आयुक्त पदावर करण्यात आली आहे.राज्याचे अपर मुख्य सचिव वी.राधा यांनी याबाबतचा बदली आदेश काढला आहे.

विधानसभा निवडणुकीपूर्वी राज्याचे शिक्षण आयुक्त सुरज मांढरे यांची बदली क्रीडा आयुक्तपदी करण्यात आली होती.मात्र, मांढरे यांच्याकडेच शिक्षण आयुक्त पदाची अतिरिक्त जबाबदारी देण्यात आली होती. त्यामुळे राज्याला नवीन शिक्षण आयुक्त मिळणार हे स्पष्ट झाले होते. परंतु, शिक्षण आयुक्त पदाची जबाबदारी कोणाकडे सोपविली जाणार याबाबत उत्सुकता होती.अखेर 31 डिसेंबर रोजी शिक्षण आयुक्तपदी सचिंद्र प्रताप सिंह यांची बदली करण्यात आली आहे.

राज्यात नवीन शैक्षणिक धोरणाच्या अंमलबजावणीस सुरुवात झाली आहे.शालेय शिक्षण विभागातर्फे सुद्धा याबाबतची तयारी करण्यात आली आहे. त्याचप्रमाणे गेल्या काही महिन्यांपासून राज्यात शालेय विद्यार्थ्यांवरील लैंगिक अत्याचाराच्या घटना सातत्याने समोर येत आहेत. त्यामुळे नवीन शिक्षण आयुक्तांसमोर शैक्षणिक प्रश्नांबरोबरच विद्यार्थ्यांच्या सुरक्षिततेबाबतचे प्रशासकीय प्रश्न सोडविण्याचे आव्हान आहे.