मुंबई विद्यापीठ : उन्हाळी सत्र परीक्षांच्या तारखा जाहीर 

एज्युवार्ता न्यूज नेटवर्क 

मुंबई विद्यापीठाने (Mumbai University) उन्हाळी सत्र परीक्षांच्या तारीखा जाहीर (Summer session exam dates announced) केल्या आहेत. विविध विद्या शाखेच्या परीक्षांच्या तारखा जाहीर करण्यात आल्या असून त्यानुसार बी.एस्सी. सत्र ६ आणि बीए सत्र ६ अभ्यासक्रमांची परीक्षा २६ मार्चपासून सुरू होणार आहे. तसेच बी.एस्सी. आयटी सत्र ६ ची परीक्षा २६ मार्च, वाणिज्य व व्यवस्थापन विद्या शाखेअंतर्गत स्वयंअर्थसहाय्यित विषयांची परीक्षा १८ मार्च, बी.एम.एम. आणि बी.ए.एम.एम.सी. सत्र ६ ची परीक्षा २६ मार्चपासून घेण्याचे विद्यापीठाने नियोजित केले आहे.

विद्यापीठाने जाहीर केलेल्या या परीक्षा ४३९ परीक्षा केंद्रांवर घेतल्या जाणार आहेत. या परीक्षेला १ लाख ३८ हजार विद्यार्थी  बसणार आहेत. त्यामध्ये मानव्य विज्ञान शाखेसाठी १४ हजार ७२३, वाणिज्य शाखेसाठी ७४ हजार ४८३, विज्ञान २७ हजार १३४, तंत्रज्ञान १३ हजार ४, विधी ८ हजार ७२५ विद्यार्थी परीक्षा देणार आहेत. यात ७५ हजार ३४६ मुले, ६२ हजार ७१७ मुली आणि इतर ६ विद्यार्थ्यांचा समावेश आहे, अशी माहिती विद्यापीठ प्रशासनाकडून देण्यात आली आहे. 

प्रवेशपत्रांचा गोंधळ टाळण्यासाठी विद्यापीठाने डिजिटल प्रणाली विकसित केली आहे. त्यानुसार ३ महिन्यांपूर्वीच विद्यार्थ्यांना त्यांच्या आसन क्रमांकासह परीक्षा केंद्र आणि परीक्षेची माहिती ऑनलाईन उपलब्ध केली जाणार आहे. परीक्षा विभागाचे उन्हाळी सत्र २०२५ च्या परीक्षांचे सूक्ष्म नियोजन केले आहे. अशी माहिती परीक्षा व मूल्यमापन मंडळाच्या संचालक डॉ. पूजा रौंदळे यांनी दिली. तसेच विद्यार्थ्यांचे विषय, आसन क्रमांक आणि अनुषंगिक तपशीलाचे तात्पुरते प्रवेशपत्र महाविद्यालयांच्या लॉगीनमध्ये उपलब्ध आहे. तसेच सर्व महाविद्यालयांनी काही दुरूस्ती असल्यास तात्काळ संपर्क साधावा, असेही आवाहन रौंदळे यांनी केले.