"गुरुपौर्णिमा" कृतज्ञतेचे संस्कार रुजविणारा सोहळा...

एज्युवार्ता न्यूज नेटवर्क 

म. ए. सो. पूर्व प्राथमिक शाळा बारामती विभागात गुरुपौर्णिमेनिमित्त मातृ पितृ पूजन (पाद्यपूजन) कार्यक्रम भक्तिमय व संस्कारमय वातावरणात मोठ्या उत्साहात साजरा करण्यात आला. कार्यक्रमाची सुरुवात  सरस्वती पूजन व महर्षी व्यास यांच्या प्रतिमा पूजनाने झाली. यावेळी शाळेच्या माजी मुख्याध्यापिका श्रीमती. सीमा जांगळे तसेच माजी शिक्षिका श्रीमती. भक्ती वेदपाठक या प्रमुख पाहुण्या म्हणून उपस्थित होत्या.

गुरुपौर्णिमेचे औचित्य साधून गुरु-शिष्य जोड्यांची ओळख करून देण्यात आली. विद्यार्थ्यांनी आपल्या गुरूंप्रती आदर, प्रेम व कृतज्ञतेची भावना व्यक्त केली. त्यानंतर मातृ-पितृ पूजन व पाद्यपूजनाचा हृदयस्पर्शी सोहळा पार पडला. विद्यार्थ्यांनी आपल्या आई-वडिलांचे पूजन करून त्यांच्याप्रती असलेली कृतज्ञता व्यक्त केली.

 याप्रसंगी अनिता ताईंनी आपल्या आशीर्वाचनातून गुरु, माता-पिता आणि संस्कारांचे जीवनातील अनन्यसाधारण महत्त्व अधोरेखित केले. गुरुपौर्णिमेनिमित्त विद्यार्थ्यांना प्रेरणादायी कथा सांगण्यात आली.

गुरुपौर्णिमेच्या निमित्ताने शाळेत "कृतज्ञता निधी"या उपक्रमाचा शुभारंभ करण्यात आला.  संपूर्ण कार्यक्रमास विद्यार्थी, पालक, शिक्षक, माजी शिक्षिका आणि मान्यवरांचा उत्स्फूर्त प्रतिसाद लाभला.

गुरुपौर्णिमेच्या या संस्कारमय उपक्रमातून विद्यार्थ्यांच्या मनात गुरू, माता-पिता आणि भारतीय संस्कृतीविषयी आदर, कृतज्ञता व संस्कारांची बीजे रुजविण्याचा सुंदर प्रयत्न करण्यात आला.

या उपक्रमास शाला समिती अध्यक्ष मा. श्री अजय पुरोहित तसेच शाळेचे महामात्र डॉ. गोविंद कुलकर्णी तसेच संस्थेचे सर्व मा. सदस्य , शाळेच्या मुख्या. मा.सौ. अनिता तावरे यांनी प्रेरणादायी व प्रोत्साहन मार्गदर्शन शुभेच्छा देऊन विद्यार्थी शिक्षक व बालकांचे कौतुक केले आणि अशा संस्कारक्षम उपक्रमाचे महत्त्व अधोरेखित केले.