गाइडच्या त्रासाला कंटाळून पीएच.डी. विद्यार्थिनीची आत्महत्या, सुसाईड नोटमध्ये गंभीर आरोप

एज्युवार्ता  न्यूज नेटवर्क

पुण्यातील उच्च शिक्षण क्षेत्राला (Pune Crime News) हादरवून सोडणारी एक धक्कादायक घटना समोर आली आहे.  पिंपरी-चिंचवडच्या शाहूनगर येथे ३० वर्षीय पीएच.डी. विद्यार्थिनीने (PhD Student) आपल्या गाईडकडून होत असलेल्या मानसिक छळाला (Mental Harassment) कंटाळून आत्महत्या (Student's Suicide) केल्याची घटना उघड झाली. या प्रकरणामुळे शैक्षणिक वर्तुळात मोठी खळबळ उडाली आहे. या प्रकरणी पोलिसांनी विद्यार्थिनीचा गाइड डॉ. ए. बेन्नीयामीन याला अटक (Student's Guide Arrested) केली आहे. 

मिळालेल्या माहितीनुसार, ही विद्यार्थिनी बॉटनी विषयात पीएच.डी. करत होती. संशोधनाच्या कामादरम्यान तिच्या गाईडकडून वारंवार मानसिक त्रास दिला जात असल्याचा आरोप करण्यात आला आहे. अखेर या छळाला कंटाळून तिने टोकाचे पाऊल उचलत आत्महत्या केली. विशेष म्हणजे, आत्महत्येपूर्वी तिने एक सुसाईड नोट लिहून ठेवली असून, त्यामध्ये गाईडवर गंभीर आरोप करण्यात आले आहेत.

सुसाईड नोटमध्ये विद्यार्थिनीने नमूद केले आहे की, गेल्या काही महिन्यांपासून तिला सतत त्रास दिला जात होता. संशोधनाशी संबंधित कारणांवरून तिला मानसिक दबावाखाली ठेवण्यात येत होते, तसेच गाईडकडून गैरवर्तन झाल्याचाही उल्लेख तिने केला आहे. या सर्व परिस्थितीमुळे ती प्रचंड तणावाखाली गेली होती आणि अखेर तिने आत्महत्येचा निर्णय घेतल्याचे समोर आले आहे.

दरम्यान, या घटनेमुळे पीएच.डी. संशोधन क्षेत्रातील मार्गदर्शक आणि विद्यार्थ्यांमधील संबंधांबाबत पुन्हा एकदा चर्चा सुरू झाली आहे. विद्यार्थ्यांवर होणारा मानसिक ताण, मार्गदर्शकांकडून होणारा दबाव आणि त्यावर नियंत्रण ठेवण्यासाठी आवश्यक असलेल्या यंत्रणांची गरज अधोरेखित होत आहे. या प्रकरणाचा सखोल तपास करून दोषींवर कठोर कारवाई करावी, अशी मागणी विविध स्तरांतून होत आहे.