इमारत नसताना इंजिनिअरिंग कॉलेज सुरू; युवासेनेचा आरोप, खोडसाळपणातून आरोप केल्याचा संस्थेचा दावा

एज्युवार्ता न्यूज नेटवर्क 

व्यावसायिक महाविद्यालय 'एआयसीटीई'च्या नियमावलीनुसार सुरू करता येतात. तसेच डॉ. बाबासाहेब आंबेडकर तंत्रज्ञान विद्यापीठ, लोणेरे (डीबाटू) या विद्यापीठाच्या मान्यतेने सीईटीमार्फत संबंधित महाविद्यालयात प्रवेश घेण्याची परवानगी मिळते. त्यासाठी महाविद्यालयाने सर्व नियमांची व पायाभूत सुविधांची पूर्तता करणे गरजेचे आहे. मात्र, महाराष्ट्र एज्युकेशन सोसायटीच्या (एमईएस) संस्थेचे मुकुंददास लोहिया इंजिनीरिंग कॉलेज हे महाविद्यालय इमारत पूर्ण नसताना सुरू झाले आहे. केवळ नफेखोरीच्या दृष्टीने विद्यार्थ्यांना कोणत्याही पायाभूत सुविधा उपलब्ध न करून देता कॉलेज सुरू करून देणे म्हणजे विद्यार्थ्यांच्या शैक्षणिक भवितव्याशी खेळ आहे,असा आरोप युवासेनेचे सहसचिव कल्पेश यादव यांनी केला आहे.तसेच कोणत्याही नियमांची पूर्तता केलेली नसताना कॉलेजला मान्यता देणाऱ्या आणि विद्यार्थ्यांचे प्रवेश सुरू करणाऱ्यास परवानगी देणाऱ्या संबंधित अधिकाऱ्यांवर कारवाई करावी, अशी मागणी पत्रकार परिषदेत केली आहे.मात्र, हा केवळ खोडसाळपणा असून याबाबत संबंधिता विरोधात कायदेशीर कारवाई करण्याचे काम सुरू आहे,असे महाराष्ट्र एज्युकेशन सोसायटीतर्फे कळविण्यात आले आहे.

 कॉलेजची इमारत अस्तित्वात नसताना कॉलेज सुरू करण्यात आले.त्यामुळे कॉलेज सध्या हरवले असून ते सापडून देणाऱ्यास बक्षीस दिले जाईल, असे फलक कल्पेश यादव यांनी  शहरभर लावले असल्याचे सांगितले.तसेच व्यावसायिक अभ्यासक्रमाच्या महाविद्यालयांमध्ये इंजिनिअरिंग अभ्यासक्रमाशी निगडित असणाऱ्या प्रयोगशाळा उपलब्ध असणे बंधनकारक आहे. परंतु, सध्या मुकुंददास लोहिया इंजिनिअरिंग कॉलेजमध्ये कोणत्याही पायाभूत सुविधा उपलब्धच नाहीत. इंजिनिअरिंग कॉलेजच्या इमारतीचे बांधकाम अद्याप पूर्ण झालेले नाही. इमारत पूर्ण झालेली नसताना एआयसीटीई,डीबाटू विद्यापीठाने कॉलेजची संलग्नतेची प्रक्रिया पूर्ण केली. तसेच पुणे विभागीय तंत्र शिक्षण विभागाने (डीटीई) डोळे झाकून इमारतीमध्ये कोणत्याही सुविधा उपलब्ध नसताना प्रवेशास परवानगी दिली. त्याचप्रमाणे शुल्क नियामक प्राधिकरणाने (एफआरए) नसणाऱ्या कॉलेजचे शुल्क ठरविले आहे. अशा प्रकारे एमईएस संस्थेने विद्यार्थ्यांची फसवणूक केली असून एआयसीटीई, डीबाटू, डीटीई या सर्वांना कोणत्या अमिषाला बळी पाडले गेले आणि बेकायदेशीर परवानगी मिळवली. हे मोठे गुढ आहे.विद्यार्थ्यांच्या शैक्षणिक भवितव्याचा विचार करून युवासेनेने याबाबत आवाज उठवण्याचा निर्णय घेतला, असेही कल्पेश यादव यांनी सांगितले.

युवासेनेने यासर्व परिस्थितीवर प्रश्न उपस्थित केले आहेत. 

१) मुकुंददास लोहिया कॉलेजची इमारत पूर्ण झालेले नसताना इंजीनियरिंगचे प्रवेश देण्यास कोणी परवानगी दिली.

२) 'एआयसीटीई'च्या नियमांचे पालन करणे बंधनकारक असताना या नियमांचे उल्लंघन करणाऱ्या संस्थेवर आता काय कारवाई केली जाणार आहे.

३) डीबाटू या विद्यापीठाच्या कोणत्या समितीने कॉलेजला प्रत्यक्षात भेट दिली. इमारत अपूर्ण असताना परवानगी देणाऱ्या या समितीतील सदस्यांवर कारवाई होणार का?

४) 'डीटीई'च्या अधिकाऱ्यांनी महाविद्यालयातील बांधकाम इमारत अस्तित्वात नसताना तसेच सर्व सोयी सुविधा विकसित नसताना इंजिनिअरिंग कॉलेजच्या मान्यतेसाठी अहवाल ,ना हरकत पत्र देण्यामागची भूमिका संशयास्पद आहे.  त्याचप्रमाणे महाविद्यालयात प्रथम वर्ष इंजिनिअरिंग अभ्यासक्रमाच्या प्रवेशास मान्यता देण्याचा खोटा अहवाल का सादर केला? यामागे तंत्र शिक्षण विभागाचे सहसंचालक जबाबदार असल्याचे निदर्शनास येत आहे.

५) बांधकाम इमारत, सोई सुविधांच्या आधारे शुल्क निश्चिती केली जाते. त्यामुळे कोणत्याही सुविधा नसताना (एफआरए) शुल्क निश्चिती परवानगी कशी दिली गेली. हे सर्व काही संशयास्पद असल्याचे दिसून येत आहे.
------------------------
मुकुंददास लोहिया इंजीनियरिंग कॉलेजला बेकायदेशीर परवानगी देणाऱ्या डीटीई व डीबाटू च्या सहसंचालक ,शुल्क नियामक प्राधिकरणाच्या अध्यक्षासह कमिटीच्या संबंधित पदाधिकाऱ्यांवर तात्काळ कारवाई करावी. बांधकाम इमारत तसेच कोणत्याही सोयीसुविधा उपलब्ध नसताना विद्यार्थ्यांना प्रवेश देणाऱ्या संस्थेची मान्यता रद्द करावी. अन्यथा युवा सेनेतर्फे तीव्र आंदोलन केले जाईल, असेही कल्पेश यादव सांगितले. 

-----------------------------------------

महाराष्ट्र एज्युकेशन सोसायटीचे मुकुंददास लोहिया कॉलेज ऑफ इंजिनिअरिंग हे कायदेशीर पद्धतीने आणि नियमानुसार कार्यरत आहे. ऑल इंडिया कॉन्सिल फॉर टेक्निकल एज्युकेशन (एआयसीटी) आणि डॉ. बाबासाहेब आंबेडकर तंत्रशास्त्र विद्यापीठ (बाटू) यांच्याकडून महाविद्यालयाच्या कामकाजासंदर्भात आवश्यक असलेल्या सर्व परवानग्या प्राप्त झाल्यानंतरच महाविद्यालयाचे कामकाज सुरू करण्यात आले आहे.

महाविद्यालयाचा पत्ता असलेल्या जागेवर इमारत अस्तित्वात आहे. या ठिकाणी प्रथम वर्षाच्या शिक्षणासाठी आवश्यक असलेल्या सर्व सुविधा उपलब्ध असून प्रथम वर्षाचे शिक्षण सुरू आहे. विद्यार्थ्यांच्या वाढीव संख्या लक्षात घेऊन नवीन इमारतीचे बांधकाम देखील सुरु आहे. सध्याच्या इमारतीत विद्यार्थी शिक्षण घेत असून या संदर्भात पालकवर्गाची कोणतीही तक्रार नाही.

मात्र, संस्था आणि महाविद्यालय यांची बदनामी करण्यासाठी खोडसाळपणाने "हरवलेले कॉलेज शोधणे आहे!" असे शीर्षक असलेला माहितीफलक पुणे शहरात सार्वजनिक ठिकाणी प्रदर्शित करण्यात आला आहे. संस्था अथवा महाविद्यालय यापैकी कोणाशीही संपर्क साधून आवश्यक माहिती जाणून न घेता संबंधितांनी खोडसाळपणे हे कृत्य केले आहे. महाराष्ट्र एज्युकेशन सोसायटी या अपप्रचाराचा आणि हीनवृत्तीचा निषेध करीत आहे. यासंदर्भात आवश्यक असलेली कायदेशीर कारवाई संस्थेतर्फे करण्यात येत आहे.

राष्ट्रीय शिक्षण देण्याच्या हेतूने स्थापन झालेल्या महाराष्ट्र एज्युकेशन सोसायटीला १६५ वर्षांची दैदिप्यमान शैक्षणिक परंपरा आहे. समाजाच्या सर्व स्तरात शिक्षण पोहोचवण्यासाठी संस्था निरंतर कार्यरत आहे. विद्यार्थीकेंद्री आणि कालानुरुप शिक्षण उपलब्ध करून देण्याच्या पवित्र कार्यात संस्था यापुढे देखील आपले योगदान देत राहील,असे महाराष्ट्र एज्युकेशन सोसायटीतर्फे कळविण्यात आले आहे.