पुण्यात वाडा येथे दुसरी 'क्लस्टर शाळा'; 7 शाळांचे केले समायोजन
वाडा गावच्या परिसरातील सात छोट्या-छोट्या वाडी वस्तीवरील मुलांना एकत्र आणून ही क्लस्टर स्कूल सुरू करण्यात येणार आहे. या सात वाड्यांमध्ये एकूण १२८ विद्यार्थी शिक्षण घेत आहेत. ही सर्व मुले आता क्लस्टर स्कूलमध्ये शिक्षण घेणार आहेत. या शाळेत इयत्ता पहिली ते सातवीपर्यंतचे वर्ग असतील.
eduvarta@gmail.com 
एज्युवार्ता न्यूज नेटवर्क
मराठी शाळांमधील विद्यार्थ्यांची संख्या दिवसेंदिवस कमी होत चालली आहे. त्यामुळे शिक्षण विभाग जिल्हा परिषदेमार्फत (Education Department Pune Zilla Parishad) विविध योजना राबवून नवीन उपक्रम राबविले जात आहेत. मागील वर्षी विद्यार्थ्यांना दर्जेदार आणि प्रभावी शिक्षण मिळावे, या उद्देशाने पुणे जिल्हा परिषदेने पानशेत येथे "क्लस्टर स्कूल" (Cluster School Initiative) हा पथदर्शी प्रकल्प सुरू केला. या उपक्रमाला मिळालेल्या प्रतिसादानंतर आता खेड तालुक्यातील वाडा या गावातही क्लस्टर स्कूल (Wada Zilla Parishad School Start) सुरू करण्याचा निर्णय जिल्हा परिषदेने घेतला आहे. वाडा येथे 112 विद्यार्थ्यांची दुसरी क्लस्टर शाळा सुरू झाली आहे.
वाडा गावच्या परिसरातील सात छोट्या-छोट्या वाडी वस्तीवरील मुलांना एकत्र आणून ही क्लस्टर स्कूल सुरू केली आहे. या सात वाड्यांमध्ये एकूण १२८ विद्यार्थी शिक्षण घेत आहेत. ही सर्व मुले आता क्लस्टर स्कूलमध्ये शिक्षण घेणार आहेत. या शाळेत इयत्ता पहिली ते चौथीपर्यंतचे वर्ग असतील. स्थानिक प्रशासन, शाळा व्यवस्थापन समित्या, पालक व ग्रामस्थ यांच्या सहकार्यातून जिल्हा परिषदेने क्लस्टर स्कूल हा उपक्रम सुरू केला आहे. पुणे जिल्ह्यात पानशेत नंतर आता वाडा गाव येथील दुसरे स्कस्टर स्कूल असणार आहे.
पानशेत येथील क्लस्टर शाळेमध्ये विद्यार्थ्यांना एकत्रितपणे उत्तम शिक्षण, आधुनिक सुविधा, प्रशिक्षित शिक्षक आणि वैविध्यपूर्ण शिक्षण मिळत आहे. त्यामुळे या शाळेचा दर्जा उंचावला गेला. या अनुभवाच्या आधारे जिल्हा परिषदेकडून वाडा गाव येथेही अशाच स्वरूपाची शाळा उभारण्यात येत आहे. वाडा गाव येथे सुरु करण्यात येत असलेल्या क्लस्टर स्कूलमध्ये विद्यार्थ्यांची ने-आण करण्यासाठी वाहतुकीची व्यवस्था करण्यात आली आहे. खेड तालुक्यातील काही शाळांमध्ये विद्यार्थ्यांची संख्या अत्यल्प असून, त्यामुळे शिक्षकांची नियुक्ती, उपक्रमांची अंमलबजावणी व विद्यार्थ्यांचे सर्वांगीण शिक्षण या बाबतीत अडथळे निर्माण होत होते. ही अडचण दूर करण्यासाठी एकत्रित शाळेची संकल्पना राबवण्यात येत आहे, असे शिक्षण विभागातील अधिकाऱ्यांनी सांगितले.
________________________________________________
पानशेत नंतर पुण्यात वाडा येथे दुसरी क्लस्टर शाळा सुरू करण्यात आली आहे. 7 शाळांचे समायोजन करून येथे क्लस्टर स्कूल उभारण्यात आली आहे.या शाळेत आता 112 विद्यार्थी शिक्षण घेत आहेत.इयत्ता पहिली ते चौथीपर्यंतचे येथे वर्ग आहेत. विद्यार्थ्यांच्या सर्वांगीण विकासासाठी हा निर्णय घेतला आहे. विद्यार्थ्यांमधील आवश्यक सामाजिक व भावनिक बदलांसाठी क्लस्टर शाळा उपयुक्त ठरणार आहे.
- संजय नाईकडे, शिक्षण अधिकारी प्राथमिक, जिल्हा परिषद, पुणे
